türkiye puqraliri ukrainagha kimliki bilenla baralaydu

türkiye awazi radiyosi xewiri: kimliki bilen türkiyege qarap uchqan ukrainaliqlar olturghan ayropilan enqere esenbogha ayrodurumigha qondi. ayrodurumda ukrainaliqlarni qarshi élish murasimida söz qilghan ukrainaning enqerediki bash elchisi andri siybiha 14-martta imzalanghan kélishimning bügün ijra qilinishqa bashlighanliqini we kimlik bilen türkiyede sayahet qilishning bashlanghanliqi munasiwiti bilen nahayitimu xushal ikenlikini bildürdi.

u, bu qétimqi ayropilan sepirining tarixiy ehmiyetke ige ikenlikini tekitlep, buning ikki dölet otturisidiki istratégiyelik shérikchilik munasiwetni ispatlap bergenlikini eskertti. u mundaq dédi:

«ötken yili ukrainadin türkiyege 1 milyondin artuq sayahetchi keldi, türkiyedin ukrainagha 200 mingdin artuq sayahetchi bardi. bu kélishim bilen reqemlerde %30 lik éshishni ümid qilimiz» dédi.

kimliki bilen türkiyege kelgen tunji sayahet ömiki ichidin orun alghan ukrainaliq zhurnalist olga wdowénko, özining tunji ömek bilen türkiyege kelgenlikidin xushal ikenlikini, türkiyege buningdin burunmu kelgenlikini, ukrainaliqlarning türkiyege hem sayahet hemde soda-sétiq ishliri bilen kélishni yaxshi köridighanliqini éytti.

enqerede 14-martta imzalanghan we ikki dölet puqralirining qsiqa mezgillik sayahetlirige asanliq yaritip bérishni meqset qilghan kélishimge asaslanghanda, türkiye we ukraina puqraliri 180 kün ichide jemiy 90 kündin ashmasliq sherti bilen bir-birining döletlirige pasportsiz bérip-kéleleydu.