amérika zapas néftining bir qismini satidu
amérika énérgiye ministirliqi istratégiyelik néfit zapisining bir qismini döletning ul-eslihe asasiy qurulmisini zamaniwiylashturush ishlirida paydilinish üchün sétishqa chiqirilidighanliqini uqturdi.
türkiye awazi radiyosi xewiri: amérika énérgiye ministirliqi döletning ul-eslihe asasiy qurulmilirini zamaniwiylashturush üchün néfit zapisining bir qismining sétlidighanliqini élan qildi. ministirliqning bu heqtiki bayanatida, jemiy 695.1 milyon waril bolghan istratégiyelik xam néfit zapisining 8 milyon warilining baha talashturup sétilidighanliqi؛ «Shell Trading» we «Phillips» qatarliq 66 shirketning jemiy 6.4 milyon waril néfitni sétiwélish hoquqigha érishkenliki bildürüldi.
bayanatta, néfit zapisini sétish arqiliq qolgha keltürülgen kirimning, istratégiyelik néfit ambarlirining ul-eslihe asasiy qurulmisini zamaniwiylashturushqa ishlitishning pilan qilinghanliqi eskertildi.
amérikining gherbiy téksas türidiki xam néfitining waril bahasini 53 dollardin hésablighanda, sétilidighan 6.4 milyon waril zapas néfittin 340 milyon dollar kirim qilinidu. amérika kongresi 2015-yili öktebirde testiqlighan xamchot qanuni istratégiyelik ambarlarni zamaniwiylashturush üchün 2 milyard dollar qimmitide néfit sétishqa ruxset qilidu. 2015-yili dékabirda qobul qilinghan yene bir qanun bolsa, 2023-yildin 2025-yilighiche ambarlardiki 66 milyon waril néfitni sétip, amérikining tashyollirini yaxshilash üchün ishlitishke ruxset qilidu.
amérikining istratégiyelik néfit ambarliri, urush, tebiiy apet qatarliq sewebler tüpeylidin xam néfit yétishmeslikining yüz bermesliki üchün muhim ehmiyetke ige.
