türkiye afghanistangha 24 tonna insanperwerlik yardimi qildi

türkiye awazi radiyosi xewiri: türkiye qizilay jemiyiti bilen jiddiy ehwallargha taqabil turush qomandanliq merkizi teripidin teyyarlanghan insanperwerlik yardem buyumliri qachilanghan türkiye hawa armiyesige tewe herbiy yük ayropilani afghanistanning shimalidiki mazar-shérif ayrodurumigha qondi.

insanperwerlik yardem buyumliri 2 ming ediyal, 14 ming 300 kilogiram yémeklik we 7 tonna dora qatarliqlarni öz ichige alidu.

türkiyedin ewetilgen insanperwerlik yardem buyumliri aldimizdiki künlerde kelkün apitining tesirige eng köp uchrighan baghlan, tahar we bedexshan wilayetliridiki talapetke uchrighan aililerge tarqitip bérilidu.

11-5-may künliri qara yamghur keltürüp chiqarghan kelkün apitide bedexshan, tahar we baghlan wilayetliridiki 21 nahiye  éghir talapetke uchrighan idi.

kelkün apiti sewebidin 300 din artuq adem hayatidin ayrilghanidi.

afghanistanda qish aylirida yaghqan qarning hawarayining issishigha egiship érishi, qara yamghur netijiside yüz bergen kelkün apiti we ul eslihelerning yéterlik bolmasliqi adem ölüsh we yarilinish ehwali hem mal-mülükning ziyangha uchrishini keltürüp chiqarmaqta. bu dölette her yili kelkün apitide yüzlerche adem ölüp ketmekte.

afghanistanda pat-pat yüz bergen tebiiy apetlerdin kéyin, türkiye qizilay jemiyiti, türkiye hemkarliq we kordinatsiye idarisi we jiddiy ehwallargha taqabil turush qomandanliq merkizi qatarliq organlar hemkarliship talapetke uchrighan aililerge insanperwerlik yardem bérish xizmiti ishlimekte.