türkiye ereb elliri ittipaqining qararidin xursen
türkiye ereb elliri ittipaqining behreyn xitabnamisige kirgüzülgen pelestinge munasiwetlik qararliridin xursen ikenlikini bildürdi.
türkiye awazi radiyosi xewiri: türkiye jumhuriyiti tashqi ishlar ministirliqi teripidin élan qilinghan yazma bayanatta, 33 – we 34 – nöwetlik ereb elliri ittipaqi bashliqlar yighinida 16-may küni maqullanghan «behreyin xitabnamisi» ge pelestinge munasiwetlik qararlarning kirgüzülüshidin enqerening intayin xursen ikenliki eskertilip mundaq déyildi:
«bu qararlarning israiliyening ghezzede dawamlashturuwatqan qirghinchiliqining toxtishi we pelestin mesilisige üzül - késil hel qilish charisi tépishqa töhpe qoshidighanliqigha ishinimiz. birleshken döletler teshkilati we xelqara jemiyetning bu tewsiyelerning yolgha qoyulushigha konkrét töhpilerni qoshushini ümid qilimiz.»
ereb elliri ittipaqi bashliqlar yighinidin kéyin, behreyin padishahi hemed bin isa elxelife ereb elliri ittipaqi bash katipi ehmed ebu gheyt bilen birlikte qoshma axbarat élan qilish yighini ötküzgenidi.
ereb elliri ittipaqi bash katipi ehmed ebu gheyt axbarat élan qilish yighinida, «behreyin xitabnamisi» de, «ghezze rayonida derhal urush toxtitish we musteqil pelestin döliti qurushqa kapaletlik qilish meqsitide ottura sherqte xelqaraliq tinchliq yighini ötküzüshke chaqiriq qilinghanliqi» ni tekitigenidi.
rehberler bashliqlar yighini xitabnamiside, «israiliyening ghezze rayonida dawamlashturuwatqan wehshiylerche hujumliri, pelestin puqralirigha qarita sadir qiliwatqan jinayetliri we xelqara qanun we xelqara insanperwerlik qanunigha misli körülüp baqmighan derijide xilapliq qilish qilmishliri» ni qattiq eyibligenidi.
