erdoghan: baku-tiflis-qars tömür yolini toluq eslige keltürüsh üchün xizmet ishlewatimiz
dölitimiz (türkiye jumhuriyiti) jumhur reisi rejep tayyip erdoghan baku-tiflis-qars tömür yolini toluq eslige keltürüsh üchün dawamliq xizmet ishlewatqanliqlirini éytti.
türkiye awazi radiyosi xewiri: jumhur reis rejep tayyip erdoghan dölet ishliri ziyaritide bolush üchün paytext enqerege kelgen giruziye bash ministiri irakli kobaxidzé bilen körüshkendin kéyin ötküzgen qoshma axbarat élan qilish yighinida mundaq dédi:
«dostane dölet giruziye xelqining 10 kündin kéyinki musteqilliq künini hazirdin bashlapla qizghin tebrikleymen. méhman bash ministir irakli kobaxidzé bilen ikki dostane, qoshna dölet we istratégiyelik shérik döletning rehberliri süpitide muhim uchrishishlarni élip barduq.»
erdoghan bultur ikki dölet otturisidiki 3 milyard bolghan soda omumiy sommisini yéngi mezgilde 5 milyard dollargha yetküzüshni nishan qiliwatqanliqlirini eskertip mundaq dédi:
«tarixiy yipek yolini rélislar arqiliq qaytidin ishqa kirishtürüshte muhim rol oynaydighan baku-tiflis-qars tömür yolini toluq eslige keltürüsh üchün dawamliq xizmet ishlewatimiz.»
jumhur reis erdoghan giruziye bash ministiri irakli kobaxidzé bilen fethullahchi térrorluq teshkilati we bölgünchi térrorluq teshkilati p k k qatarliq térrorluq teshkilatliri hem teshkillik jinayet shaykilirige qarshi küreshte türtkilik rol oynaydighan qedemlerni tashlash heqqide muzakire élip barghanliqlirini tekitlep mundaq dédi:
«dölitimiz térrorluq teshkilatliri we teshkillik jinayet shaykilirigha qarshi keskin küresh qilishni izchil dawamlashturidu.»
erdoghan türkiye dölet komandisining yawropa putbol lewhe talishish musabiqiside giruziye komandisi bilen bir guruppida ikenlikini eskertip mundaq dédi:
«komandilirimizgha aldin utuq tileymen.»
méhman bash ministir irakli kobaxidzé bolsa jumhur reis erdoghanni ziyaret qilghanliqidin özini tolimu bextlik hés qilidighanliqini eskertip mundaq dédi:
«jumhur reis erdoghan türkiye xelqining menpeetini jan tikip qoghdawatqan mislisiz rehberdur. jumhur reis erdoghan ependim giruziyening milliy menpeetini izchil qollap kéliwatidu, buningdin intayin xursenmiz, buning üchün jumhur reis erdoghangha köptin - köp rehmet éytimiz. biz kawkaz döletlirining teng mewjut bolup turush pirinsipini qollaymiz, biz herdaim ijabiy hemkarliq ornitish terepdarimiz.»
yene bir tereptin, uchrishishlardin kéyin, ikki dölet otturisida «énérgiye saheside hemkarliq ornitish kélishim layihesi» imzalandi.
