erdoghan: nétanyahu jawabkarliqqa tartilidu
dölitimiz (türkiye jumhuriyiti) jumhur reisi rejep tayyip erdoghan israiliye bash ministiri bényamin nétanyahu we ghezzediki irqiy qirghinchiliqqa daxil bolghanlarning tökülgen her bir tamche qan üchün jawabkarliqqa tartilidighanliqini éytti.
türkiye awazi radiyosi xewiri: jumhur reis rejep tayyip erdoghan adalet we tereqqiyat partiyesining türkiye büyük millet mejlisi (parlaménti) diki guruppa yighinida qilghan sözide, israiliyening ghezzede uda 7 aydin buyan üzlüksiz dawamlishiwatqan irqiy qirghinchiliqigha yene bir qétim naraziliq bildürüp mundaq dédi:
«nétanyahu we ghezzediki irqiy qirghinchiliqqa daxil bolghanlarning hemmisi tökülgen her bir tamche qan üchün jawabkarliqqa tartilidu. bizmu irqiy qirghinchilarning qanun aldida jawabliqqa tartilishigha kapaletlik qilish üchün ularni dawamliq köztimiz. héchkim <israiliye ghezzede menggü qalidu> dep xata oylap qalmisun. eger bu azghun döletni, bu térrorchi döletni <toxtap tur> démise, haman bir küni <wede qilinghan zéminlar> xam xiyalining qaymuqturushi bilen diqqitini anadolugha aghduridu.»
erdoghan hem musteqilliqi üchün küresh qiliwatqan hemde anadoluni qoghdawatqan pelestin qarshiliq herikiti (hamas) ni dawamliq qollaydighanliqlirini éytti.
u israiliye terepning tetür teshwiqatlirigha naraziliq bildürüp mundaq dédi:
«siyonist (esebiy yehudiy) qatillar we ularning gumashtilirining bizni hujum nishani qilishi bizni qilche qorqutalmaydu, hetta qilimiznimu tewritelmeydu, eksiche bu biz pexirlengen halda kökrikimizni kérip qizghin qarshi alidighan sherep belgisi hésablinidu.»
