türkiye yawropa ittipaqi bashliqlar yighini qararliri toghrisida bayanat élan qildi

türkiye awazi radiyosi xewiri: türkiye jumhuriyiti tashqi ishlar ministirliqi 17-18-aprél künliri biryussélda chaqirilghan yawropa ittipaqigha eza döletlerning dölet we hökümet bashliqliri alahide yighinining netijisi heqqide yazma bayanat élan qildi.

bélgiyening paytexti biryussélda ötküzülgen bashliqlar yighinida maqullanghan türkiyege munasiwetlik qararlarning, yawropa ittipaqining türkiye we yer shari tereqqiyatigha qarita istratégiyelik tesewwurining yoqluqining yéngi misalini shekillendürgenlikige isharet qilinghan bayanatta, yighinning axirida, türkiye bilen hemkarliq ornitish we özara nep yetküzüsh munasiwitini ilgiri sürüshning yawropa ittipaqining istratégiyelik menpeetige uyghun ikenlikining tekitlengenliki qeyt qilindi.

yene bir tereptin, yawropa ittipaqi komitétining muawin reisi, qoshumche tashqi ishlar we bixeterlik siyasiti boyiche aliy wekili josép borrél we yawropa ittipaqi komitéti birlikte teyyarlighan yawropa-türkiye munasiwitige dair tewsiyelerni chöridep konkrét qararlarni chiqiralmasliqining éghir tutruqsizliqning ipadisi ikenlikige isharet qilinghan bayanatta: «biz türkiye-yawropa munasiwetlirining ilgirilishi bilen qibris mesilisini munasiwetleshtürülüshini hergizmu qobul qilmaymiz. köp yönilishlik türkiye-yawropa ittipaqi munasiwetlirini qibris mesilisige taraytip qoyidighan chüshenchidin waz kéchish kérek. bundaq tonush ne qibris mesilisige, ne rayon we xelqaraliq mesililerge berpachi töhpe qoshalmaydu» dégen ibarilerge orun bérildi.

bayanatta, kandidat dölet türkiyening yawropa ittipaqigha eza bolush mesilisidiki qetiy iradisini saqlap kéliwatqanliqi qeyt qilinip: «buning bilen birlikte, biz munasiwetlirimizning mueyyen saheler bilen cheklinishini ret qilimiz. yawropa ittipaqi bilen söhbetlirimizge özara hörmet qilish asasida yawropa ittipaqining aldimizdiki mezgilde türkiyege qarita tashlaydighan qedemlirining süriti, sewiyesi we dairisige qarap muamile qilimiz» déyildi.