erdoghan bulghariye hoquq we erkinlik herikitining qurultiyigha télégramma yollidi
jumhur reis rejep tayyip erdoghan hoquq we erkinlik herikitining türkiye-bulghariye hemkarliqigha töhpe qoshqanliqini bildürdi.
türkiye awazi radiyosi xewiri: erdoghan bulghariye hoquq we erkinlik herikitining qurultiyigha yollighan sin körünüshlük télégrammsida, türkiyede 31-martta yerlik saylam ötküzülidighanliqini eskertip: «biz saylam sewebidin nahayiti aldirash boluwatimiz. gerche men jismaniy jehettin aranglarda bolalmighan bolsammu, qelbimning siler bilen bille ikenlikini silermu bilisiler. rebbimning arimizdiki méhri-muhebbet we hemkarliqni menggülük qilishini tileymen» dédi.
bulghariyening türkiyening intayin qimmetlik ittipaqdishi we ishenchlik dosti ikenlikini tekitligen erdoghan: «biz köp tereplimilik xirislargha duch kéliwatqan mushundaq bir peytte, türkiye-bulghariye munasiwitining ilgirilishige alahide ehmiyet bermektimiz. bulghariye bilen bolghan munasiwitimizni her sahede yaxshilashqa tirishmaqtimiz we mushundaq qilishning her ikki döletning ortaq menpeetige küch béghishlaydighanliqigha ishinimiz. elwette, yurtdashlirimiz ikki dölet otturisida ornitilghan küchlük insaniy köwrüklerni mustehkemleshte intayin muhim rol oynaydu» dédi.
jumhur reis erdoghan hoquq we erkinlik herikitining bulghariye üchün muhimliqini tekitlidi we sözini dawamlashturup: «biz hoquq we erkinlik herikitining bulghariye siyasiti we démokratiyesining bir parchisigha aylanghanliqidin xushalmiz. bu heriket türkiye-bulghariye hemkarliqigha töhpe qoshush bilen birlikte, yurtdashlirimizning menpeetini qoghdashtimu körünerlik utuqlarni qolgha keltürdi. yéngidin saylinidighan rehberlerning bu chüshenchini chöridep, saylighuchilarning ümidini muhim orungha qoyup, téximu sighdurushchan halette dawamliq algha ilgirileydighanliqigha ishinimen. qurultay netijiside wekillerning iradisi bilen saylinidighan teng hoquqluq bashliqlar, jümlidin partiyening her qaysi qatlamlirida wezipe öteydighan xadimlargha chin qelbimdin utuq tileymen» dégenlerni qeyt qildi.
bulghariye hoquq we erkinlik herikitining özini qurultaygha teklip qilghanliqigha minnetdarliq bildürgen jumhur reis erdoghan: «men bulghariyede yashaydighan barliq yurtdashlirimizgha, hoquq we erkinlik herikitining barliq ezalirigha we bulghariyelik dostlirimizgha salam yollaymen» dégenlerni sözlirige ilawe qildi.
