yilmaz mejlis omumiy yighinida söz qildi
muawin jumhur reis jewdet yilmaz qaysi dölet qanchilik yardem qilishidin qetiynezer, türkiyege qaritilghan barliq tehditlerni yoqitalaydighan iradisi we küchining barliqini bildürdi.
türkiye awazi radiyosi xewiri: muawin jumhur reis jewdet yilmaz hökümetke wakaliten türkiye büyük milliy mejlisining omumiy yighinida 2024-yilliq xamchot toghrisida söz qildi.
u eng yéngi térrorluq hujumi we türkiyening térrorluqqa qarshi kürishi üstide toxtilip, térrorluqning démokratiye, tereqqiyat we insaniyetning düshmini ikenlikini tekitlep, térrorluq bar yerde, heq-hoquq we erkinliklerdin, ijtimaiy parawanliq, kishilerning xatirjemliki we xushalliqini tilgha alghili bolmaydighanliqini éytti .
u p k k, daésh, fethullahchi térrorluq teshkilati we bashqa barliq térrorluq teshkilatlirini eyibleydighanliqlirini bildürdi.
u türkiyening süriye we iraqtiki mewjutluqining térrorluq teshkilatini yoqitish, ikkinchi qétim tehdit peyda qilishining aldini élish asasigha tayinidighanliqini, térrorluqqa qarshi kürishining xelqara qanun boyiche özini qoghdash dairiside, qoshna döletlerning igilik hoquqi we zémin pütünlükige hörmet qilish pirinsipida ching turghan asasta, peqet térrorluq unsurlirinila nishan qilip élip bérilidighanliqini qeyt qildi.
u türkiyening héchkimning zéminida közi yoqluqini, emma héchqandaq küchningmu bashqa döletlerning zémini arqiliq türkiyege qarshi heriket élip bérishigha yol qoymighanliqini we yol qoymaydighanliqini tekitlidi.
u térroristlar üchün héchqandaq jayning bixeter emeslikini, qeyerde bir térrorchi bolsa, u yerning nishangha aylinidighanliqini eskertip, térroristlarning kimdin yardem élishidin qetiynezer, herbiy heriketlerning kücheygen halda toxtimay dawam qilidighanliqini, küreshning térrorluqqa we térroristlarghila qarshi ikenlikini qeyt qildi.
