erdoghan: israiliye ghezzede insaniyetke qarshi jinayet sadir qiliwatidu
jumhur reis rejep tayyip erdoghan: «yawropa we amérikaning shertsiz qollishigha érishken israiliye hökümiti, toluq 25 kündin buyan pütkül dunyaning közi aldida insaniyetke qarshi jinayet sadir qilmaqta» dédi.
türkiye awazi radiyosi xewiri: jumhur reis erdoghan paytext enqerede ötküzülgen kabinét yighinidin kéyin élan qilghan bayanati jeryanida, israiliyening pelestinge qaratqan hujumliri heqqide toxtilip: «ghezzelik qérindashlirimiz 7- öktebirdin buyan nahayiti éghir zulum we rehimsizlikke duchar qilinmaqta. yawropa we amérikaning shertsiz qollishigha érishken israiliye hökümiti, toluq 25 kündin buyan pütkül dunyaning közi aldida insaniyetke qarshi jinayet sadir qilmaqta» dédi.
rak bimarlirini dawalaydighan türkiye- pelestin dostluq doxturxanisining israiliyening wehshiylikining eng yéngi qurbani ikenlikini tilgha alghan erdoghan: «biz dölet eqlini pütünley yoqitip, teshkilatqa oxshash heriket qiliwatqan israiliyeni imkaniyetning yétishiche téz toxtitish kéreklikige ishinimiz... israiliyening biwasite halda puqralargha qaratqan hujumliri netijiside, hazirghiche köpinchisi bowaqlar, balilar we ayallar bolup 8500 pelestinlik shéhit qilindi. bizning ghezzede sadir qilinghan urush jinayetliri jawabkarlirining qanun aldida jawabkarliqini sürüshtürüsh yolidiki xizmetlirimiz dawam qilmaqta» dégenlerni qeyt qildi.
türkiyening toqunushning birinchi künidin bashlap otturigha qoyup kéliwatqan insanperwer, adil we shereplik pozitsiyesining bügünmu dawam qiliwatqanliqigha isharet qilghan erdoghan: «25- künini arqida qaldurghan bu qirghinchiliqning aldini élish, bizning eng muhim ishimiz. buning üchün urush toxtitishning kapaletke ige qilinishi, andin menggülük tinchliqning yoli échilishi kérek. biz barliq alaqidar tereplerning qatnishishi bilen ötküzülidighan <pelestin- israiliye xelqara tinchliq yighini> ning, buning üchün eng muwapiq supa bolidighanliqigha ishinimiz» dédi.
türkiyening rayondiki küchlerning özara hemkarliship yéngi bixeterlik méxanizmi ornitishni zörür dep qaraydighanliqini, eger bu qedem tashlansa, türkiyening mesuliyetni üstige élishqa teyyar ikenlikini bayan qilghan erdoghan: «gherb dunyasi, bolupmu yawropa döletliri ghezzediki insanliq siniqidin yene bir qétim ötelmidi» dégenlerni sözlirige ilawe qildi.
erdoghan yene, türkiyening bir qismi ghezzeliklerning qoligha yetken yardem matériyalliri omumiy hejimining 213 tonnigha yetkenlikini qeyt qildi.
مۇناسىۋەتلىك خەۋەرلەر
türkiye-girétsiye söhbet yighini istanbulda chaqirildi
türkiye-girétsiye «berpachi küntertip diyalogi»ning 6-qétimliq yighini istanbulda ötküzüldi.
