jumhur reis erdoghan istanbulda ötküzülgen büyük pelestin yighilishida nutuq sözlidi

türkiye awazi radyosi xewiri: jumhur reis rejep tayyip erdoghan israiliye 3 heptidin buyan bombardiman qiliwatqan ghezze rayonidiki  weqelerge süküt qiliwatqan gherb döletlirini, «ukrainada qaza qilghanlar üchün yash töktinglar, emma némishqa ghezzediki kichik balilargha awaz chiqarmaysen?» dep tenqid qildi.

erdoghan: «ete türkiye jumhuriyiti qurulghanliqining 100 - yilliqining xushalliq joshqisini, bügün bolsa bügün ghezze üchün qelblirimizde yéniwatqan otning azabini pütün dunyagha jakarlaymiz. upuqlirimiz yétip baralighan hemmila yerde qelbliri we közlirini bizge qaratqan qérindashlirimizning derdi bilen dertlinimiz.  bizmu ghezze üchün toplinimiz» dédi.

erdoghan qirimdin qarabaghqiche, bosniyedin kerkükqiche, pelestindin türkistanghiche, afghanistandin chéchiniyegiche bolghan nurghun jughrapiyediki azablar üchün yash tökkenlikini bildürüp, «biz peqetla ghezzediki qirghinchiliqni eyiblepla qalmay, shuning bilen birge özimizning musteqilliqi we kelgüsimiznimu qoghdaymiz» dédi.

pelestin qarshiliq körsitish herikiti hamasning térorluq teshkilati emeslikini yene bir qétim tekitligen erdoghan bu sözidin biaram bolghan israiliyege naraziliq bildürüp, «1947-yili ghezze pelestinning qeyiri idi bügün qeyiri?  bügün néme boldi? i israil! sen  bu yerlergiche  qandaq kelding? bu yerlerge qandaq kirding? sen bir ishghaliyetchi we bir teshkilatsen» dédi.

tünügün ukraina-rusiye urushida öltürülgen puqralar üchün timsah köz yashlirini tökkenlerning bügün minglighan bigunah kichik balining (ghezzede) öltürilishini ün-tinsiz tamasha qiliwatqanliqi tekitlep, «siler ukrainada ölgenler üchün yash töktinglar, emma némishqa ghezzediki kichik balilar üchün awazinglar chiqmaydu?» dep tenqid qildi.

erdoghan israiliye qirghinchiliqini qollawatqan gherb dunyasigha xitab qilip: «i gherb! silerge xitap qiliwatimen. qaytidin bir hilal ay - ehli selip urishini bashlashni xalamsiler? eger mushundaq urunush ichide bolsanglar, shuni bilinglarki, bu millet téxi ölmidi» dédi.

gherb dunyasining ghezzediki kichik balilar, ayallar we bigunahlargha qaritilghan qirghinchiliqni yolluqlashturush üchün siyasetchiliridin tartip axbarat rganlirighiche seperwer qilghanliqini tekitlep, israiliyening ashkara urush jinayiti ötküziwatqanliqini éytti.  

erdoghan israiliyeni urush jinayetchisi dep élan qilidighanliqini tekitlep: «hazir biz buninggha teyyarliq qiliwatimiz, buning üstide tirishiwatimiz we israiliyeni urush jinayetchisi süpitide pütün dunyagha tonushturimiz» dédi.

israiliyening 7-öktebirdin buyan ghezzege qilghan hujumida köpinchisi kichik balilar we ayallar bolüp jemiy 7 mingdin artuq pelestinlik hayatidin ayrildi.