ezerbeyjanda «mustapa kamal atatürk» manéwiri bashlandi

türkiye awazi radiyosi xewiri: ezerbeyjan dölet mudapie ministirliqining bildürüshiche, «2023 – yilliq mustapa kamal atatürk» namliq birleshme manéwir, türkiye jumhuriyiti qurulghanliqining 100 – yilliqini tebriklesh munasiwiti bilen, baku, nexchiwan we ishghaliyettin azad qilinghan rayonlarda birla waqitta bashlanghan.

3 ming xadim, 130 tanka - bironiwék, texminen 100 zembirek we bashqurulidighan bomba sistémisi, texminen 20 ayropilan, tik uchar birleshme manéwirgha qatnashqan.

bayanatta tekitlinishiche, birleshme herbiy manéwir dawamida, bashqurulidighan bomba we zembirek qisimliri ayropilan, tik ucharlar bilen zamaniwi jeng qilish usulliri arqiliq maharet körsitidiken: chaqmaq tézlikide deryadin ötüsh köwrükliri yasilip, simwolluq düshmenge qarshi hujumgha ötülidiken.

birleshme herbiy manéwirning nishani, türkiye - ezerbeyjan armiyeliri otturisidiki uchur – alaqeni kücheytish we mas qedemde heriket qilish iqtidarini yenimu yüksek sewiyege yetküzüsh iken.

türkiye - ezerbeyjan qoralliq qisimlirining «2023 – yilliq mustapa kamal atatürk» namliq birleshme manéwiri 25-öktebirgiche dawamlishidiken.