erdoghan nyuyorktiki türkiye öyide her qaysi döletlerning rehberlirini qobul qildi

türkiye awazi radiyosi xewiri: jumhur reis  rejep tayyip erdoghan birleshken döletler teshkilati (b d t) omumiy kéngishi yighinigha ishitrak qilish üchün barghan amérika qoshma ishtatlirining nyuyork shehiridiki türk öyide girétsiye bash ministiri michotaksni  qobul qildi؛ uchrishishqa türkiye tashqi ishlar ministiri xaqan fidan we girétsiyelik mensepdishi giorgos gérapétritismu qatnashti.

erdoghan bilen michotaks ikki dölet munasiwitidiki nöwettiki ijabiy keypiyatni saqlap qélish iradisini otturigha qoydi.

5 - séntebir paytext enqerede ötküzülgen tashqi ishlar ministirliri yighinida maqullanghan mesililermu rehberlerning küntertipide idi؛ erdoghan bilen michotaks u yighinda qarar qilinghan ikki dölet alaqisige munasiwetlik yol xeritisi we waqit jedwilini testiqlidi.

buninggha asasen, ikki döletning muawin tashqi ishlar ministirliri yighini öktebirde, ishenchni ashurush tedbirliri yighini 11 - ayda ötküzülidu.

7 - dékabir girétsiyening selanik shehiride türkiye - girétsiye yuqiri derijilik hemkarliq kéngishi yighini ötküzülidu.

ikki rehber tünügünki uchrishishi jeryanida yene rayon we xelqaragha alaqidar mesililer toghrisida pikir almashturdi.

köchmenler mesilisining her ikki dölet üchün ortaq qiyinchiliq ikenlikini tonup yetken asasta heriket qilish toghrisida kélishim hasil qilindi.

erdoghan bilen michotakis aq déngiz rayonidiki tebiiy apetler we kilimat kirizisliri heqqidimu sözleshti.

puqralarni qoghdash sahesidiki hemkarliqni muhim orungha qoyup kücheytish toghrisida birdeklik hasil qilindi.

jumhur reis erdoghan michotaks bilen körüshkendin kéyin, özining ijtimaiy taratqudiki adrésida uchur hembehrilep, bu uchrishishning her ikki döletke paydiliq bolushini tilidi.

jumhur reis erdoghan arqidin jenubiy afriqa pirézidénti ramafosa bilen körüshüp, ikki döletning nöwettiki ikki tereplik we köp tereplik mewjut munasiwitini téximu mustehkemlesh yolida tashlinidighan qedemlerni muzakire qildi.

uchrishishtin kéyin, erdoghan «türkiye bolush süpitimiz bilen, afriqa chong quruqluqi bilen bolghan yéqin hemkarliqimizni, shérikchilikimizni we ittipaqliqimizni dawamlashturimiz» dédi.

jumhur reis erdoghan yene malayshiya bash ministiri enwer ibrahimni qobul qildi. uchrishishta, rayon we dunyawi mesililer shundaqla mudapie sanaiti sahesidiki hemkarliqqa qarap tashlinidighan qedemler muzakire qilindi.

jumhur reis yene nyuyorktiki türköyide amérika yehudiylar jamaiti chong teshkilatlirining wekilliri bilenmu körüshti.

erdoghan türk öyidiki uchrishishliridin kéyin, amérikadiki türkiye puqraliri bilen söhbetleshti.