erdoghan tüzüp chiqilishi pilanliniwatqan yéngi asasiy qanun toghrisida toxtaldi
jumhur reis rejep tayyip erdoghan: insanni aldinqi orungha qoyidighan, milletning köp xilliqi we bayliqini eks ettüridighan, jemiyetning arqisida qalghan emes, uninggha hayatiy küch béghishlaydighan bir asasiy qanun tüzüp chiqishni nishan qiliwatimiz.
türkiye awazi radiyosi xewiri: jumhur reis erdoghan paytext enqerede ötküzülgen yéngi asasiy qanun söhbet yighinigha qatnashti.
erdoghan özlirining döletni yéngi, puqrawiy, démokratik, erkinlikni yaqlighuchi sighdurushchanbir asasiy qanungha ige qilish nishanidin waz kechmigenliklirini tekitlep: «xelqimizni <türkiye esiri> nishanimizning amillirining biri bolghan yéngi asasiy qanungha ige qilmighuche ishleshni, tirishchanliq körsitishni we küresh qilishni hergiz toxtatmaymiz» dédi.
nöwettiki asasiy qanunning köp qétim tüzitish kirgüzülgen bolushigha qarimay, éhtiyajni qandurushtin yiraq ikenlikini tilgha alghan erdoghan, bu asasiy qanungha asasen yashashni dawamlashturushning siyaset üchünmu, dölet üchünmu kötürüp kétish qiyin yükke aylanghanliqini qeyt qildi we sözini dawamlashturup: «biz insanni aldinqi orungha qoyidighan, milletning köp xilliqi we bayliqini eks ettüridighan, jemiyetning arqisida qalghan emes, uninggha hayatiy küch béghishlaydighan bir asasiy qanun tüzüp chiqishni nishan qiliwatimiz» dédi.
u yene: «men barliq siyasiy partiyeler, ijtimaiy küchler bashqurushidiki organlar we tetqiqatchilarni köngüldikidek asasiy qanun tékisti teyyarlap chiqish üchün söhbetlishishke, bes – munazire qilishqa we muzakirilishishke chaqirimen» dédi.
jumhur reis erdoghan yene: «biz parlaménttiki barliq guruppilar bilen sözlishimiz we körüshimiz. eger ular buninggha ijabiy qarisa, yolimizni dawamlashturimiz. jumhur ittipaqi bolush süpitimiz bilen biz buninggha teyyarmiz» dégenlerni sözlirige ilawe qildi.
