türkiye bilen ereb birleshme xelipiliki 50 milyard 700 milyon dollarliq kélishim imzalidi
türkiye bilen ereb birleshme xelipiliki otturisida 50 milyard 700 milyon dollarliq kélishim imzalandi.
türkiye awazi radiyosi xewiri: jumhur reis rejep tayyip erdoghan tünügün pars qoltuqi döletliri ziyaritining axirqi békiti bolghan ereb birleshme xelipilikide xelipilik reisi sheyx muhemmed bin zayid al nehyan teripidin resmiy murasim bilen qarshi élindi.
elweten sariyida ötküzülgen murasimdin kéyin, erdoghan bilen al nehyan ayrim körüshti, andin heyetler ara söhbetke ishtirak qildi.
erdoghan yighinda qilghan sözide, ikki dölet otturisida imzalinidighan ortaq kélishim bilen munasiwetlerning istratégiyelik shériklik derijisige yétidighanliqini tilgha élip: «biz yuqiri derijilik istratégiyelik kéngesh méxanizmi arqiliq munasiwitimizning eng yuqiri sewiyede qerellik muzakire qilinishigha kapaletlik qilimiz» dédi.
erdoghan 7-ayning 25- künidin 28- künigiche istanbulda ötküzülidighan xelqara mudapie sanaiti yermenkisi bilen bu hemkarliqning ilgiri sürülidighanliqini tekitlep, ebuzebi xelqara kitab yermenkisige «eziz méhman» süpitide teklip qilinghanliqidin söyüngenlikini ipadilidi.
u bu yil ichide ebuzebide türkiye medeniyet merkizini échish arqiliq bu hemkarliqni yüksek pellige kötürüshni xalaydighanliqlirini bildürdi.
ikki rehberning sözidin kéyin, türkiye bilen ereb birleshme xelipiliki otturisida meblegh sélish, iqtisad, sanaet, mudapie, qanun, edliye, qayta hasil bolidighan énérgiye we alem boshluqi sanaiti qatarliq sahelerde omumiy sommisi 50 milyard 700 milyon dollargha yétidighan 13 türlük kélishim imzalandi.
al nehyan söhbetlerdin kéyin, jumhur reis erdoghangha «zayd dölet médali» teqdim qildi.
erdoghan bilen al nehyan bu yil ereb birleshme xelipilikide ötküzülidighan birleshken döletler teshkilati kilimat özgirishi yighini üchün alahide teyyarlanghan bileyzükni taqap süretke chüshti.
al nehyan jumhur reis erdoghanni bashliqlar yighinigha teklip qildi.
umu al nehyangha türkiyening tunji yerlik mashinisi toggni sowgha qildi.
al nehyan elweten sariyidin «pamuqqele éqi» renggidiki toggni heydep erdoghan bilen birlikte ebuzebi kochilirini aylandi.
andin, al nehyan jumhur reis erdoghanni u turuwatqan méhmanxanigha togg bilen ekélip qoydi.
