türkiye - qatar birleshme bayanat élan qildi

türkiye awazi radiyosi xewiri: türkiye bilen qatar otturisida diplomatik munasiwet ornitilghanliqining 50 yilliqi munasiwiti bilen élan qilinghan bayanatta, ikki qérindash dölet we ularning xelqlirining menpeetige paydiliq iqtisadiy we soda munasiwetlirini ilgiri sürüshning chin dildin arzu qilinidighanliqi otturigha qoyuldi.

türkiye jumhuriyiti jumhur reislik mehkimisi uchur – alaqe ishliri idarisi bayanat élan qilip, jumhur reis rejep tayyip erdoghan bilen qatar emiri sheyx temim bin hemed al sani riyasetchilikide qatardiki lusail sariyida ötküzülgen wekiller ömekliri uchrishishining béshida, türkiye bilen qatar otturisida diplomatik munasiwet ornitilghanliqining 50 yilliqi munasiwiti bilen birleshme bayanat élan qilinghanliqini uqturdi.

dölitimiz (türkiye jumhuriyiti) tashqi ishlar ministiri xaqan fidan we qatar tashqi ishlar ministiri sheyx muhemmed bin abdurrahman bin jasim  al sani teripidin imzalanghan birleshme bayanatta, diplomatik munasiwet ornitilghanliqining 50 yilliqining tebriklengenlikidin xushalliq hés qilinghanliqi qeyt qilindi.

türkiye - qatar munasiwitining munasiwetler ornitilghan 1973 – yilidin tartip taki istratégiyelik hemkarliq basquchigha kelgenge qeder süpetlik özgirishlerni bashtin kechürgenlikige isharet qilinghan bayanatta, ikki qérindash dölet otturisidiki hemkarliqning jumhur reis erdoghan we qatar emiri al sanining rehberlikide kündin - künge küchiyiwatqanliqi tekitlendi.

bayanatta mundaq déyildi: «türkiye - qatar munasiwiti siyasiy we ijtimaiy asas üstige qurulghan yiltizi chongqur tarixiy munasiwet؛ chünki ikki dölet qérindashliq we ittipaqliq rohi bilen, öz tarixidiki nurghun muhim burulush nuqtilirida bir - birini ikkilenmestin qollap keldi.»

bularning axirqi ipadisining 2023 - yili 2 - ayda türkiye bashtin kechürgen yer tewresh apiti jeryanida bérilgen yardemde körülgenliki tilgha élinghan bayanatta töwendiki ibarilerge orun bérildi:

«bu ittipaqliq rohining qatar dölitining yer tewresh yüz bergen tunji lehzilerdin bashlapla hawa karidori tesis qilip, herbiy ayropilanlar bilen yötkep, minglarche türkning azab – uqubetlirini yenggillitishke qoshqan tengdashsiz insanperwerlik yardemliride öz ipadisini tapti.

türkiye bilen qatarning nöwettiki istratégiyelik shériklik munasiwiti her qaysi sahelerde ünümlük bolup, ikki dölet köpligen rayon we xelqaraliq mesililerde oxshash pozitsiye namayan qilmaqta. ikki tereplik munasiwet arqa körünüshide, yuqiri derijilik istratégiyelik komitét méxanizmi, ezaliri 2015 – yilidin buyan her yili bir yerge jem bolup kéliwatqan ikki qérindash dölet otturisidiki hemkarliqning eng konkrét körsetküchlirining biri.

bu istratégiyelik komitét arqiliq, herqaysi sahelerdiki ikki tereplik hemkarliq sewiyesini yuqiri kötürüshni meqset qilghan 100 ge yéqin höjjet imzalandi. ikki döletning iqtisadiy we soda hemkarliqi ötken bir qanche yilda soda we meblegh sélish miqdari jehette muqim éshishni bashtin kechürdi. biz ikki qérindash dölet we xelqimizning menpeeti üchün xizmet qilidighan iqtisadiy we soda munasiwitini ilgiri sürüshni chin dilimizdin ümid qilimiz».