yilmaz: yéngi tamozhna ittipaqining ünümi téximu yuqiri bolidu

türkiye awazi radiyosi xewiri: muawin jumhur reis jewdet yilmaz xususiy bir téléwiziye qanilida küntertipke alaqidar soallargha jawab berdi.

yilmaz dölitimiz (türkiye jumhuriyiti) jumhur reisi rejep tayyip erdoghanning paris qoltuqi döletlirige qilidighan ziyariti harpisida, aldinqi hepte xezine we maliye ministiri mehmet shimshek bilen birlikte bu döletlerde élip barghan ziyaret heqqide toxtaldi.

u türkiyening bu ziyaretlerdin meblegh sélish jehette körünerlik payda alidighanliqigha ishinidighanliqini bayan qildi, hemde énérgiyedin mudapie sanaitigiche, sayahetchiliktin ul eslihe layihelirigiche bolghan nurghun sahelerde hemkarliq pursetlirining barliqini éytti.

yilmaz jumhur reis rejep tayyip erdoghanning paris qoltuqi ellirige qilidighan dölet ishliri ziyariti arqiliq bezi konkrét netijilerning qolgha  keltürülidighanliqini eskertip mundaq dédi: «buningdin kéyinki mezgilde bu ziyaretning netijilirini körimiz, men türkiyege téximu köp meblegh sélinidighanliqigha chin dilimdin ishinimen.»

u yawropa ittipaqi bilen bolghan munasiwetlerde  tamozhna ittipaqining belgilimilirini yéngilash we wizisiz sayahet mesililiride téximu qoyuq xizmetlerning ishlinidighanliqini eskertip mundaq dédi: «hazirqi tamozhna ittipaqi peqet sanaet sahesi bilenla cheklinidu. yéngi tamozhna ittipaqi sanaet sahesidin sirt yene, mulazimet sahesi, döletlik xizmet sahesi qatarliq keng dairilik sahelerni  öz ichige alidu. shundaqla téximu ünümlük we keng dairilik iqtisadiy hemkarliq pursetlirini yaritip béridu. bu her ikki terepkimu paydiliqtur.»

yilmaz türkiyening ezeldin meblegh salghuchilargha keng pursetlerni yaritip bérip kéliwatqan dölet ikenlikini tekitlidi, hemde türkiyege kelgen meblegh salghuchilarning héchqachan ziyan tartmaydighanliqini, chünki türkiyening wediside ching turidighan, yaxshi meblegh sélish pursiti yaritip béridighan bir dölet ikenlikini qeyt qildi.