jewdet yilmaz shimaliy qibris türk jumhuriyitini ziyaret qildi
muawin jumhur reis jewdet yilmaz sherqiy aqdéngiz heqqide toxtilip: «biz türkiye we shimaliy qibris türk jumhuriyitining qanunluq heq-hoquqlirini adaqqiche qoghdaymiz» dédi.
türkiye awazi radiyosi xewiri: muawin jumhur reis jewdet yilmaz tunji chet el ziyariti shimaliy qibris türk jumhuriyitidin bashlidi. u lefkoshada bir téléwiziye qanilining ziyaritini qobul qilip, soallirigha jawab berdi.
u shimaliy qibris türk jumhuriyitining étirap qilinishigha munasiwetlik ilgirileshler üstide toxtilip: «biz yéqinda intayin istratégiyelik bir ilgirileshni qolgha keltürduq. biz kéyinki mezgilde shimaliy qibris türk jumhuriyitining étirap qilinishigha zor küch chiqirimiz. shimaliy qibris türk jumhuriyitining türk döletliri teshkilatida közetküchi eza bolushi melum menidin éytqanda, buning muhim belgisi. shimaliy qibris türk jumhuriyitidiki türk xelqi her qandaq shekilde az sanliq millet qatarigha ittirilse, shundaqla bashqilardin töwen orungha chüshürülse bolmaydu. barawer we igilik hoquqluq halda araldiki ornigha ige bolushi kérek. biz barliq munberlerde adaletsizliklerge qarshi toghra meydanimizni we shimaliy qibris türk jumhuriyitining qanunluq heq-hoquqlirini dawamliq qoghdaymiz.»
u sherqiy aqdéngiz üstide toxtalghanda munularni körsetti:
«sherqiy aqdéngiz intayin muhim jughrapiyelik jay, bu yerde iqtisad bar. herqaysi döletlerningmu menpeeti bar. bir mezgil türkiye we shimaliy qibris türk jumhuriyitini bu tenglimidin chiqiriwétish üchün tirishchanliq körsitildi. emma, türkiye jumhuriyitining küchi, bu yerdiki oyunlarni yoqqa chiqardi, liwiye bilen tüzülgen kélishim eng muhim kélishim idi. bu kélishim bilen barliq oyunlar yoqqa chiqti. hazir yéngi tenglime shekillendi. biz türkiye we shimaliy qibris türk jumhuriyitining qanunluq heq-hoquqlirini xelqara qanungha asasen adaqqiche qoghdaymiz, bu yerde keynige chékinish deydighan gep yoq. emma yene bir tereptin, biz <bu bir ortaq rayon, shunga bu ortaq rayondin ortaq menpeetke mas halda paydilinayli> dep chaqiriq qiliwatimiz» dédi.
u lefkoshadiki erjan ayrodurumi binasi qurulushining 20-iyulghiche axirliship-axirlashmaydighanliqi soaligha, «axirlishidu, buning üchün barliq tirishchanliqlirimizni körsitiwatimiz» dep jawab berdi.
