erdoghan: türkiye we shimaliy qibrisning heq – hoquqlirini qetiy qoghdaymiz

türkiye awazi radiyosi xewiri: jumhur reis rejep tayyip erdoghan jumhur reislik mehkimiside chaqirilghan ichki kabinét yighinidin kéyin xelqqe xitab qilghanda, bu heptining bashlirida shimaliy qibris türk jumhuriyiti we ezerbeyjangha qilghan ziyaretliri heqqide toxtaldi.

shimaliy qibris türk jumhuriyitide jumhur reis ersin tatar bilen élip barghan uchrishishlirida, türkiyening qibris dawasini küchlük shekilde qollaydighanliqini ochuq - ashkara halda bayan qilghanliqini eskertken jumhur reis erdoghan mundaq dep körsetti: «türk millitining ayrilmas bir parchisini teshkil qilidighan qibris türk xelqi bilen dawamliq mürini mürige tirep küresh qilimiz. <ana weten> bilen <ewlad weten> otturisidiki bir gewdilishishni téximu chongqurlashturush üchün qanuniy, iqtisadiy we siyasiy jehettin türlük qedemlerni tashlaymiz. ne dölitimizning, ne shimaliy qibris türk jumhuriyitining heq – hoquqlirining tartiwélinishigha qetiy yol qoymaymiz.»

jumhur reis erdoghan ezerbeyjanning paytexti bakuda pirézidént ilham eliyéw bilen körüshkende, ikki tereplik munasiwetlerni her sahede tereqqiy qildurushta türtkilik rol oynaydighan nurghun muhim qararlarni chiqarghanliqlirini eskertip mundaq dédi: «erméniye bilen élip bériliwatqan normallashturush xizmiti musapisini qollaydighanliqimizni tekitliduq. rayonimizda tinchliq we muqimliq ornitishqa bolghan küchlük iradimizni hemde ümidlirimizni yene bir qétim otturigha qoyduq. texminen 30 yilgha yéqin dawamlashqan ishghaliyettin kéyin, ezerbeyjan bayriqining bügünki künde qarabaghda lerzan lepildishini qérindashliqimizning simwoli dep qaraymiz, shundaqla buningdin intayin pexirlinimiz. qérindash dölet ezerbeyjan bilen bolghan munasiwetlirimizni iqtisadiy we siyasiy jehettin bir gewdige aylandurush üchün téximu köp tirishchanliq körsitimiz. buningdin texminen bir yérim esir ilgiri merhum ismail gaspirali otturigha qoyghan <tilda, pikirde we herikette birlik> nishanini boylap, türk dunyasi bilen bolghan munasiwetlirimizni yenimu yüksek sewiyege yetküzidighan yéngi layihelerni yolgha qoyimiz.»