türkiye natoning telipige binaen kosowogha zapas qisim yollashni qarar qildi
enqere shimaliy atlantik ehdi teshkilati — natoning telipige binaen, zapas qisim süpitide wezipe öteydighan türkiyening bir komandir bataliyonining kosowogha orunlashturulghanliqini uqturdi.
türkiye awazi radiyosi xewiri: türkiye jumhuriyiti dölet mudapie ministirliqi bayanat élan qilip: «türkiye birleshken döletler teshkilati, nato, yawropa ittipaqi we yawropa bixeterlik we hemkarliq teshkilatidiki wezipiliri bilen ikki tereplik munasiwetliri dairiside rayon we yer sharining tinchliq we muqimliqigha töhpe qoshushni dawamlashturmaqta. bu arqa körünüshte, dölitimiz ortaq tarix we medeniyet rishtisige ige balqan rayonidiki özgirishlerni yéqindin közetmekte؛ yéqinqi künlerde dost we qérindash dölet kosowining shimalida yüz bérip, rayonning bixeterlik we muqimliqqa ziyan yetküzgen weqelerni söhbet arqiliq hel qilinishi üchün, berpachi pozitsiyede bolup, tereplerni éghir - bésiq bolushqa chaqirmaqta... kosowoda yüz bergen weqelerdin kéyin, italiyening napoli shehiride turushluq nato birleshme armiyesining telipige asasen, ilgiri natoning kosowodiki tinchliq saqlash qisimliri sépide wezipe öteshke teqsim qilinghan qirqlarelidiki 65 - mashinilashqan piyade qisimlar qomandanliqidin bir bataliyon esker zapas qisim süpitide (kosowoda) wezipilendürüldi» dégen ibarilerge orun bérildi.
igilinishiche, teqsim qilinghan qisimlar 2023 - yili 6 - ayning 4 -, 5 - künliri kosowodiki sultan murat gazarmisigha yötkilidiken.
