aqar: térrorizmgha qarshi küresh axirlashqanda xelqning parawanliqi téximu ashidu

türkiye awazi radiyosi xewiri: dölet mudapie ministiri xulusi aqar tünügün (23-may) paytext enqerede bergen bayanatida, térrorizmgha qarshi küreshte nahayiti zor muweppeqiyetlerning qolgha keltürülüwatqanliqini, bu küresh axirlashqan we térrorchilar pütünley yoqitilghan chaghda xelqning parawanliqining téximu ashidighanliqini tekitlep mundaq dédi: «buning eng roshen misali <gabar téghi> dur. ilgiri <gabar téghi> térrorchilarning uwisi idi, emdilikte bolsa néfit menbesige aylandi. bu heqte izchil xizmet ishlewatimiz, bu xizmitimizning dairisini téximu kéngeytip, <gabar téghi> ni tereqqiy qildurimiz.»

ministir aqar térrorizmgha qarshi küreshning qetiy irade bilen keskin dawamlishiwatqanliqini, bu dairide,  2015-yili 7-ayning 24-künidin buyan  37 ming 886 térrorchining bir terep qilinghanliqini, aldinqi ayda bir terep qilinghan térrorchilar sanining 126 ge yetkenlikini éytti.

aqar térrorchilar üzül – késil yoqitilghangha qeder térrorizmgha qarshi küreshning üzlüksiz dawamlishidighanliqini, chégra rayonlirining türkiye jumhuriyiti tarixidin buyanqi eng keskin tedbirler arqiliq qoghdiliwatqanliqini, yéqinqi besh yil ichide chégra éghizliridin qanunsiz halda ötüshke urunghan 3 milyon 300 ming kishining tosup qélinghanliqini qeyt qildi.