türkiye amérikagha naraziliq bildürdi
türkiye amérika qoshma ishtatlirigha ait bashqurulidighan bombigha qarshi iz qoghlighuchi paraxotning limassol portini ziyaret qilishigha naraziliq bildürdi.
türkiye awazi radiyosi xewiri: türkiye tashqi ishlar ministirliqi teripidin amérika déngiz armiyesige ait «USS Arleigh Burke» namliq yétekchi bashqurulidighan bombigha qarshi iz qoghlighuchi paraxotning jenubiy qibris rum hakimiyitining kontrolluqidiki limassol portini ziyaret qilishi heqqide élan qilinghan bayanatta, mundaq déyildi: «amérika qoshma ishtatlirining rayonda hem shimaliy qibris türk jumhuriyitining menpeetige ziyanliq bolghan hem küch tengpungluqini buzidighan bu qedemliri bu döletning qibris arilida uuzun yillardin buyan dawamlashturup kéliwatqan biterep meydanigha ziyan salmaqta, hemde qibrista kirizis üchün adil, uzaq mezgillik we imkaniyetlik sijil hel qilish charisi tépishqa tosalghu peyda qilmaqta.»
ministirliq bu heqtiki yazma bayanatida, sherqiy aqdéngizda wezipe ötewatqan amérika qoshma ishtatlirining 6-filotigha qarashliq «USS Arleigh Burke» namliq bashqurulidighan bombigha qarshi iz qoghlighuchi paraxottin burun amérikaning bir su asti paraxotining jenubiy qibris rum hakimiyiti portlirini ziyaret qilishigha qarita bayanat élan qilghan shimaliy qibris türk jumhuriyitini küchlük qollaydighanliqini bildürdi.
bayanatta, mundaq déyildi: «shimaliy qibris türk jumhuriyiti bilen birlikte ilgirimu köp qétim tekitliginimizdek, amérika qoshma ishtatlirining rayonda hem shimaliy qibris türk jumhuriyitining aliy menpeetlirige ziyanliq hemde küch tengpungluqini buzidighan bu qedemliri bu döletning qibris arilida uzun yillardin buyan dawamlashturup kéliwatqan biterep meydanigha ziyan salmaqta, hemde qibrista kirizis üchün adil, uzaq mezgillik we imkaniyetlik sijil hel qilish charisi tépishqa tosalghu peyda qilmaqta. amérika qoshma ishtatlirini bu siyasetlirini közdin kechürüshke chaqirimiz.»
«qibrista kapaletchi dölet salahiyitige ige türkiyening herqandaq shert – sharait astida qibris türklirining heq – hoquqlirini jan tikip qoghdashni dawamlashturidighanliqini yene bir qétim tekitleymiz.»
shimaliy qibris türk jumhuriyiti tashqi ishlar ministirliqi amérika déngiz armiyesige ait «USS Arleigh Burke» namliq yétekchi bashqurulidighan bombigha qarshi iz qoghlighuchi paraxotning jenubiy qibris rum hakimiyitining kontrolluqidiki limassol portini ziyaret qilishigha naraziliq bildürgenidi.
