chawushoghlu gérmaniyede türkiyelik zhurnalistlarning tutqun qilinishini qattiq eyiblidi

türkiye awazi radiyosi xewiri: tashqi ishlar ministiri mewlut chawushoghlu türkiye tashqi ishlar ministirliqi bayanatchisi tanju bilgichning tünügün gérmaniyening enqerede turushluq bash elchisi jurgén shulzgha, gérmaniye saqchilirining «‹sabah› géziti» ning firankfort biyurosi wekillirini orunsiz tutqun qilishini qobul qilghili bolmaydighanliqini éytqanliqini bildürdi.

chawushoghlu bu heqte élan qilghan bayanatida, türkiyelik zhurnalistlarning gérmaniye saqchiliri teripidin orunsiz tutqun qilinishidin kéyin, türkiyening hem bérlin elchixanisi hem firankfort bash konsulxanisining derhal heriketke ötkenlikini eskertip mundaq dédi: «bu qilmishning heqiqeten héchqandaq izahati yoq. yawropaning otturisida, axbarat we pikir erkinliki toghrisida he désila bizge wez – nesihette bolidighan gérmaniyede <sabah> géziti hujumgha uchridi. bu zhurnalist qérindashlirimiz bezi namuwapiq muamililerge uchridi, tutqun qilindi.»

chawushoghlu türkiyening bu heqtiki diplomatik teshebbusliri netijiside zhurnalistlarning qoyup bérilgenlikini eskertti, hemde fethullahchi térorluq teshkilati unsurlirining bu zhurnalistlarning paaliyetlirige tosalghu bolushqa urunghanliqini, <sabah> gézitiningmu qilche ikkilenmeyla hem fethullahchi térorluq teshkilati hem bölgünchi térrorluq teshkilati p k k ning yirginchlik saxta niqabini yirtip tashlighanliqini tekitlidi.

ministir chawushoghlu gérmaniye dairiliri we yawropadiki bashqa döletlerningmu «‹sabah› géziti» ning pirinsipliq xewerlirining mezmunliridin toluq xewerdar ikenlikini tekitlep mundaq dédi: «gérmaniyening fethullahchi térorluq teshkilati unsurlirining bu türkiyelik zhurnalistlarning paaliyetlirige tosalghu bolush urunushigha yol qoyushimu heqiqeten ghelite ish. gérmaniye fethullahchi térorluq teshkilati unsurlirining kozérigha aylinip qéliwatidu.»  

chawushoghlu gérmaniyening enqerede turushluq bash elchisi shulzning tünügün türkiye tashqi ishlar ministirliqigha chaqirtilghanliqini we bayanatchi tanju bilgich bilen körüshtürülgenlikini bayan qilip mundaq dédi: «bilgich gérmaniye bash elchisige buni qobul qilghili bolmaydighanliqini, jümlidin türkiyelik zhurnalist qérindashlirimizning tutqun qilinishi we öylirining axturulushini qobul qilghili bolmaydighanliqini, eger birer jinayet sadir qilinish ehwali körülgen bolsa, aldi bilen bayanat bérish arqiliq tekshürüsh kéreklikini, gérmaniyening türkiyede ötküzülgen saylamdin kéyinla bundaq usulni qollinishining meqsetlik ikenlikini éytti.»

«bilgich gérmaniye bash elchisige fethullahchi térorluq teshkilati mesilisidimu  men yuqirida bayan qilghanlirimni tekitlidi, hemde bularning hemmisining axbarat we pikir erkinlikige dexli - teruz qilghanliq bolidighanliqini éytti. jümlidin, bash elchimiz, bayanatchimiz tanju ependi gérmaniye bash elchisige bu weqening türkiye xelqining qattiq naraziliqini qozghighanliqini yetküzdi.»

bu ariliqta, ministir chawushoghlu bügün antalyada bergen bayanatida, gérmaniye saqchilirining türkiyelik axbarat wasitiliri mensuplirini tutqun qilishi heqqide toxtilip mundaq dédi: «gérmaniye bash elchisini tashqi ishlar ministirliqimizgha chaqirduq, uninggha, axbarat erkinliki toghrisida pütkül dunyagha wez – nesihette bolidighan  gérmaniyening bu qosh ölchemlik pozitsiyesige qarita naraziliqimizni yetküzduq.»