türkiye sudandiki puqralirini tarqaqlashturush xizmitini tamamlidi
sudandiki dawamlishiwatqan toqunushlar sewebidin 23 – aprél bashlanghan türkiye puqralirini tarqaqlashturush xizmetliri 1 – mayda tamamlandi.
türkiye awazi radiyosi xewiri: türkiye jumhuriyiti tashqi ishlar ministirliqi yazma bayanat élan qilip: «sudan jumhuriyitide 2023- yili 15- apréldin buyan armiye bilen jiddiy yardem bérish qisimliri otturisidiki toqunush kishini endishige salidu. biz xelqaraning barliq tirishchanliqlirigha qarimay, toqunushlarning dawamlishiwatqan bolushi we puqralarning ölüsh - yarilinish nisbitining éshishidin qayghurmaqtimiz. bashta jumhur reisimiz (rejep tayyip erdoghan) bolup, tashqi ishlar ministirimiz (mewlüt chawushoghlu) we bashqa organlar weqeler bashlanghandin buyan sudandiki söhbetdashliri bilen qoyuq alaqiliship, ularni özlirini tutuwélip, urush toxtitishqa chaqirip keldi» dégenlerni qeyt qildi.
bayanatta yene: «shuning bilen bir waqitta, dölitimiz mesilining tinch yol bilen hel qilinishi üchün, türlük teshebbuslarni yolgha qoymaqta we sudanda téximu köp qérindash qénining tökülüshining aldini élish üchün, her xil diplomatik wasitilerni ishqa salmaqta» dégen ibarilerge orun bérildi.
türkiyening sudandiki puqralirini tarqaqlashturush herikitining tamamlanghanliqi otturigha qoyulghan bayanatta: «sudandiki puqralirimizning qaytip kélishige kapaletlik qilish üchün, 2023- yili 23 - aprél bashlanghan tarqaqlashturush herikitimiz bügün (1-may) tamamlandi. biz tarqaqlashturush herikitimizge töhpe qoshqan barliq döletlerge, bolupmu éfiyopiye, misir, sudan we seudi erebistangha minnetdarliq bildürimiz» déyildi.
