chawushoghlu paytext enqerede lawrow bilen qoshma muxbirlarni kütüwélish yighini ötküzdi

türkiye awazi radiyosi xewiri: dölitimiz (türkiye jumhuriyiti) tashqi ishlar ministiri mewlüt chawushoghlu israiliyeni mesjidi eqsa (eleqsa meschiti)gha qiliwatqan hujumlirini üzül – késil toxtitishqa chaqirdi.

ministir mewlüt chawushoghlu rusiye tashqi ishlar ministiri sérgéy lawrow bilen körüshkendin kéyin, paytext enqerediki pirézidéntliq mehkimiside ötküzülgen qoshma muxbirlarni kütüwélish yighinida söz qildi.

u israiliyening mesjidi eqsagha qilghan hujumi toghrisida toxtilip: «men israiliyening ramizan éyida herem sherifning muqeddesliki we tarixiy salahiyitini depsende qilghan bu hujumlirigha lenet oquymen. bolupmu israiliye saqchilirining ibadet qiliwatqan musulmanlargha qilghan muamilisini qobul qilghili bolmaydu. bu adimiylik emes» dédi.

ministir mewlüt chawushoghlu israiliye tashqi ishlar ministiri éli koxénning türkiye ziyariti jeryanida ötküzülgen uchrishishta, mesjidi eqsaning salahiyitini saqlap qélish wedisini qayta tekitligenlikini eslep ötkendin kéyin, ötken yili ramizandimu mushundaq bir sürkilishning yüz bergenlikige isharet qilip: «bügün israiliyening bixeterlik ishliri eng irqchi we eng fashist bir siyasiyongha bérildi؛ (ashqun ong qanat dölet bixeterlik ministiri itamar) bén gwirgha bérildi. bizning israiliyege qilidighan chaqirimiz, meyli mesjidi eqsagha qilinghan bu hujumlirini — bir az ilgiri toxtatqanliqining uchurini tapshurup alduq —, meyli hawa hujumlirini bolsun üzül – késil toxtitishidur... türkiye bolush süpitimiz bilen, israiliye bilen söhbetlerni yéngidin bashliduq, israiliyeni öz ichige alghan barliq terepler shuni bilishi kérekki, bu bu ish pelestin dewasini qurban qilish bedilige dawamlashturulmaydu. pelestin, mesjidi eqsa we quddus mesilisi bizning qizil siziqimiz bolup, biz her qandaq waqitta bu mesililerde yol qoymaymiz» dédi.

3-, 4- aprél künliri rusiyening paytexti chaqirilghan türkiye, rusiye, beshshar esed hakimiyiti we iran töt teripining muawin tashqi ishlar ministirliri derijilik yighini toghrisidimu toxtalghan chawushoghlu,  mezkur yighingha sahibxanliq qilghanliqi we échilishigha sharait hazirlighanliqi üchün, rusiyelik mensepdishi sérgéy lawrowgha minnetdarliq bildürdi.

u moskwada ötküzülgen töt terep yighini toghrisida mundaq dédi: «moskwada her qaysi döletler meydani we köz qarishini ochuq- ashkara ipadilidi. biz bu jeryanning mushundaq ochuq – ashkara dawamlishishi kéreklikige ishinimiz. bir – ikki yighinda barliq mesililerning bir terep qilinmaydighanliqini bilimiz. biz emeliyetchilmiz, emma diyalog dawamlishishi kérek. kéngesh yighinliriningmu oxshash usulda qoyuq halette dawamlishishi barliq terepler üchün paydiliq» dédi.

rusiye tashqi ishlar ministiri lawrowmu mensepdishi chawushoghlu bilen ikki dölet we xelqaraning küntertipidiki muhim mesililerni muzakire qilghanliqini, ikki dölet munasiwitining ünümining rehberler otturisidiki semimiylikni arqa körünüsh qilidighanliqini éytti.

u sözini dawamlashturup: «bügünki yighinda munasiwitimizde parawuzluq rolini oynawatqan türler heqqide söhbet élip barduq. bolupmu aqquyu yadro éléktir istansisi qurulushi tilgha élindi. bu éléktir istansisining qurulushi türkiyening énérgiye bixeterlikini kücheytidu. men shuni ipadilimekchimenki, 4-ayning 27-küni éléktir istansisining birinchi bölümige yadro énérgiyesi yollashni bashlaymiz.

türkiyede bir gaz merkizi qurulidu. biz rusiyening énérgiye bayliqini dunya bazirigha yetküzidighan bir merkez quruwatimiz. ötken yili dölet bashliqlirimiz we rehberlirimiz bu gaz merkizini qurush toghrisida qarar chiqarghanidi. biz bu qararning qanchilik toghra ikenlikini téximu yaxshi chüshinip yetken bolduq» dégenlerni qeyt qildi.