türkiye rehberliri ersin tatargha qilinghan aghzaki hujumgha küchlük naraziliq bildürdi

türkiye awazi radiyosi xewiri: türkiye büyük milliy mejlisi (parlaménti) reisi mustapa shentop ijtimaiy taratqudiki adrésida ersin tatargha qilinghan hujumni eyiblep: «men engliyening paytexti londonda shimaliy qibris türk jumhuriyiti jumhur reisi ersin tatargha qilinghan hujumni eyibleymen we uninggha eng yaxshi tileklirimni yetküzimen. bu we buninggha oxshash qutratquluq qilmishliri qibris türk xelqining yolluq dewasigha qilchilikmu tosqunluq qilalmaydu. milliy dewamizda qibris türkliri bilen bolghan hemkarliqni qetiylik bilen dawamlashturimiz» dédi.

ersin tatargha téléfon qilip hal sorighan türkiye jumhuriyiti muawin jumhur reisi fuat oqtay: «türkiye bolush süpitimiz bilen, biz her waqit we barliq ishlarda siler bilen birgimiz» dédi.

tashqi ishlar ministiri mewlüt chawushoghlumu jumhur reis ersin tatardin hal soridi we sözini dawamlashturup: «shimaliy qibris türk jumhuriyitining türk döletliri teshkilatigha közetküchi eza bolush qatarliq künséri küchiyiwatqan küchini hezim qilalmighan rumlar telwilishishke bashlidi» dédi.

adalet we tereqqiyat partiyesi muawin reisi numan qurtulmush hujum toghrisida toxtilip: «biz engliye dairilirini tatar ependige qilinghan bu hujumgha qarshi derhal tedbir qollinishqa chaqirimiz... qibris türklirining teqdiri bizning teqdirimizdur. hörmetlik jumhur reisimizdin semimiy hal soraymiz» dédi.

shimaliy qibris türk jumhuriyiti jumhur reisi ersin tatar engliyediki london padishah institutidiki bir pirogrammigha qatnishish üchün uniwérsitét tewelikige kiriwatqan esnada, girétsiye bayriqini kötürüwélishqan bir guruppa kishining tosqunluqigha uchrighanidi.