apetke uchrighuchilargha wiza bérish asanlashturuldi

türkiye awazi radiyosi xewiri: shiwéytsariye dölet köchmenler katibatliq bashqarmisi (SEM) bezi ehwallarni hésabqa almighanda, bu döletke kirish üchün yenila qanunluq wiza telep qilinidighanliqini eskertip, yer tewreshte öyliri weyran bolghan kishilerning tézlikte wiza élishi üchün «jiddiy qutquzush yardimi» gha iltimas qilishi kéreklikini bildürdi. alaqidar kishilerning shiwéytsariyening istanbuldiki konsulxanisidin «tamozhnidin téz ötüsh» jedwilige érisheleydighanliqi eskertilgen bayanatta, wiza bérish jeryanining shengen qanunigha asasen dawam qilidighanliqi qeyt qilindi.

gollandiye hökümitining intérnét sehipiside élan qilinghan bayanatida, türkiyedin gollandiyediki uruq-tughqanlirining yénigha kélishni xalaydighanlargha «aldin wiza bérilidighanliqi» bildürüldi.

bélgiye köchmenler we panahlinish ministiri nikol dé mor özining twittér adrésida bayanat élan qildi.

u: «nurghun bélgiyelikler türkiye we süriyediki yer tewreshning tesirige uchrighan aililirini, uruq-tughqanlirini öyide kütüwélishni xalaydu. rayondin kelgen wiza iltimasini tézrek bir terep qilish üchün yolyoruq bérildi» dédi.

engliyede tughqanliri bolghan türkiyediki yer tewreshning tesirige uchirighanlargha alahide wiza bérish üchün imza toplash seperwelik paaliyiti bashlandi.

engliye parlaméntigha sunush üchün bashlanghan murajietnamide,  bu dölettiki nurghun türklerning yer tewresh rayonida tughqanliri barliqi we hökümetning bu kishilerning tughqanliri bilen körüshüshige kapaletlik qilishi kérekliki otturigha qoyuldi.

bildürülishiche, imza seperwerlikide 100 ming imza toplansa, mezkur telep parlaméntta muzakire qilinidiken.

qahramanmarashta aldinqi hepte yüz bergen we 10 wilayetke tesiri qilghan 7.7 we 7.6 bal yer tewresh, minglighan kishining ölüp kétishige seweb boldi. bu  apet «bir esirdiki eng chong apet» dep ataldi.