türkiye puqraliri üchün amérika we yawropa döletlirige sayahet agahlandurushi élan qilindi

türkiye awazi radiyosi xewiri: dölitimiz (türkiye) tashqi ishlar ministirliqi teripidin amérika üchün élan qilinghan sayahet agahlandurushida, amérikaning ténnéssi ishtatigha qarashliq memfis shehiride tiré nikols isimlik ​​bir kishining saqchilarning zorawanliqigha uchrap qaza qilghanliqigha qarita, amérikaning herqaysi jaylirida namayishlarning ötküzüliwatqanliqi hemde pütün amérika miqyasida chet ellikllerge öchmenlik we irqchiliq jaraktérliq aghzaki shundaqla jismaniy hujumlarning yüz bériwatqanliqi eskertildi.

agahlandurushta, «puqralirimizning amérika bixeterlik qisimliri bilen ministirliqimiz, washington bash elchixanimiz we amérikadiki bash konsulxanilirimiz élan qilidighan qoshumche agahlandurush we élanlargha diqqet qilishi paydiliqtur» déyildi.

dölitimiz tashqi ishlar ministirliqi yawropa döletliri üchün élan qilghan sayahet agahlandurushidimu bir qisim yawropa döletliride islamgha düshmenlik, chet elliklerge öchmenlik we irqchiliq heriketlirining köpiyiwatqanliqi hemde térrorluq teshkilatliri bilen munasiwetlik guruppilarning türkiyege qarshi teshwiqat namayishliri küchiyiwatqanliqi tekitlendi.

agahlandurushta, yawropadiki diniy chidimasliq we nepretning xeterlik sewiyesini ekis ettüridighan bu özgirishlerning irqchi we ayrimchi éqimlarning yawropada kishini chöchütidighan sewiyege yétip kelgenlikini éniq ashkarilaydighanliqi uqturuldi.

amérika we yawropada yashaydighan yaki bu döletlerge sayahet qilishni pilanlawatqan türkiye puqralirining éhtiyaj bolghan haman tashqi ishlar ministirliqining konsulxanilar alaqe merkizining (903122922929+) numurigha téléfon qilishi kérekliki hemde uchrash éhtimali bolghan chet elliklerge öchmenlik we irqchi hujumlargha qarshi temkinlik bilen heriket qilip, yerlik bixeterlik qisimlirigha ehwalni bildürüshi lazimliqi eskertildi.