jumhur reis 2022- yilliq TRT World munbiride söz qildi
jumhur reis rejep tayyip erdoghan ashliq kirizisini hel qilish üchün yekshenbe küni rusiye pirézidénti wladimir putin we ukraina pirézidénti wolodimir zélénskiy bilen körüshidighanliqini éytti.
türkiye awazi radiyosi xewiri: jumhur reis erdoghan, istanbulda chaqirilghan 2022 - yilliq TRT World munbirining échilish murasimida söz qilip, bu yilqi munberning yuqum we rusiye - ukraina urushi tüpeyli dunya miqyasida jiddiychilik küchiyip ketken bir peytte ötküzülgenlikini tekitlidi.
rusiye-ukraina urushining nurghun ademning ölümidin ibaret éghir talapettin bashqa, rayon we dunya üchün intayin éghir insaniy, iqtisadiy we siyasiy chiqimlarni peyda qilghanliqini otturigha qoyghan erdoghan, türkiyening tinchliqni qoghdash üchün qoyuq diplomatik xizmetlerni ishlewatqanliqini, ukrainaning zémin pütünlükini küchlük shekilde qoghdash bilen birlikte, rusiyege qarshi aqilane bolmighan siyasetler arqiliq rayondiki otning ulghaytilishighimu qarshi turup kelgenliklirini bildürdi.
urush sewebidin ukraina we rusiyedin chet ellerge yötklidighan halqiliq mehsulatlarning, bolupmu ashliq yötkeshning toxtap kétishining, yawropadin afriqaghiche bolghan barliq döletlerge tesir körsetken dunyawi ashliq kirizisigha seweb bolghanliqini eskertken erdoghan, kirizisni hel qilish meqsitide yekshenbe küni putin we zélénskiy bilen körüshidighanliqini éytti.
u, sözini dawamlashturup: «ege we aqdéngizda girétsiyeni pütün küchi bilen qollap, ighwagerchiliklerge yar – yölek bolghanlargha qarap turmiduq, turmaymiz. shimaliy atlantik ehdi teshkilati — natoda birliktimiz. shundaq bolushigha qarimay, girétsiye arallirini qorallanduruwatisiler. biz hazirghiche pulisini tölep bolghan F-16 mesilisini hel qilalmaywatimiz» dédi.
türkiye yoqitish üchün küresh qiliwatqan térrorluq teshkilatlirini ashkara – yoshurun qollawatqan yawropa bilen ortaq kelgüsi berpa qilishni arzu qilishning qiyinliqini tilgha alghan erdoghan: «shunche köp pidakarliqlirimizgha qarimay, birlikimizge xewp yetküzüwatqan térrorluq teshkilatlirigha qarshi kürishimizde yalghuz tashlap qoyulghanliqimizni hergiz untup qalmaymiz. nechche ming yük mashinisi qoral, oq – dora süriyening shimalidiki térrorluq teshkilatlirigha yollandi. uni yollighini biz natoda birlikte heriket qiliwatqan bir dölet. héchkim bizning térrorchilargha qarshi kürishimizning hésabini soralmaydu. chégramizning bixeterlikini qoghdash üchün élip bériwatqan heriketlirimizni dawamlashturush iradisige ige ikenlikimizni hemme köridu» dégenlerni qeyt qildi.
