erdoghan shahbaz sherif bilen qoshma muxbirlarni kütüwélish yighini ötküzdi
jumhur reis rejep tayyip erdoghan, türkiyening pakistanning térrorizmgha qarshi turush kürishini qollaydighanliqini tekitlep, «pakistanning azabi azabimiz, xushalliqi xushalliqimiz, muweppeqiyiti muweppeqiyitimizdur» dédi.
türkiye awazi radiyosi xewiri: jumhur reis erdoghan bilen pakistan bash ministiri shahbaz sherif istanbuldiki wahdettin sariyida ayrim we heyetlerara uchrishishlarni ötküzgendin kéyin qoshma muxbirlarni kütüwélish yighini ötküzdi.
erdoghan, türkiye bilen chongqur tarixiy, medeniyet we kishilik munasiwet rishtisi bolghan pakistanning türk xelqining qelbide ezeldin alahide orunni igilep kelgenlikige isharet qilip: «men bu yerde, pakistanning térrorluqqa qarshi turush kürishini qollaydighanliqimizni yene bir qétim tekitlimekchimen. biz herdaim pakistanning azabini azabimiz, xushalliqini xushalliqimiz, muweppeqiyitini muweppeqiyitimiz dep bilduq we shundaq bilimiz» dédi.
jumhur reis erdoghan, türkiye yuqiriqidek tonushta bolghachqa, pakistan kelkünning zerbisige uchrighanda, derhal seperwerlikke kélip, 15 ayropilan, 13 poyiz bilen apet rayonigha insanperwerlik yardem matériyallirining ewetkenlikini bildürdi.
u yene, türkiye we pakistan xelqliri otturisidiki qérindashliq rishtisidin ilham élip, her sahediki munasiwetni ilgiri sürüsh üchün dawamliq tiriship kelgenliklirini eskertti.
buningdin bashqa, uchrishishta ikki dölet hemkarliqi hemde ikki dölet ortaq köngül bolidighan rayon we xelqaraliq mesililer toghrisida pikir almashturulghanliqini bildürgen erdoghan: «qérindash pakistan we eziz ezerbeyjan bilen bolghan üch terep hemkarliqimizmu téz tereqqiy qilmaqta» dégenlerni sözlirige ilawe qildi.
