erdoghan ashliq karidori kélishimining mudditining uzartilghanliqini jakarlidi

türkiye awazi radiyosi xewiri: jumhur reis erdoghan ijtimaiy alaqe supisidiki adrésida bayanat bérip, qara déngiz ashliq karidori kélishimi mudditining uzartilghanliqini élan qildi؛ u bayanatida, türkiyening sahibxanliqida ötküzülgen töt terep söhbiti netijiside, türkiye, birleshken döletler teshkilati (b d t), rusiye fédératsiyesi we ukraina otturisida chiqirilghan qarargha asasen, qara déngiz ashliq karidori kélishimining mudditi 2022 - yili  11 - ayning  19 -künigiche 120 kün uzartildi, dégen ibarilerge orun berdi.

arqimizda qalghan töt ay ichide 500 ge yéqin paraxot bilen 11 milyon tonnidin artuq ashliq we ashliq mehsulatining mohtajlargha yetküzülüshi bilen, bu kélishimning dunyaning ashliq éhtiyaji we bixeterliki üchün qanchilik muhim we paydiliq bolghanliqi roshen nayaman boldi, dégen erdoghan: «men kélishimning mudditini uzatish musapiside iradisini izhar qilghan b d t bash katipi antoniyo gutérrés, rusiye pirézidénti wladimir putin we ukraina pirézidénti wolodimir zélénskiygha minnetdarliq bildürimen, töhpe qoshqan barliq kishilerge minnetdarliqimni bildürimen. xeyrlik, mubarek bolsun!» dédi.

b d t bash katipi gutérrésmu özining ijtimaiy alaqe supisidiki adrésida uchur hembehrilep: «qara déngiz ashliq kélishimini dawamlashturush toghrisidiki kélishimni qarshi alimen» dédi.

yawropa komissiyoni reisi ursula fondér léyén tiwittérdiki adrésida élan qilghan bayanatida, özining qara déngiz ashliq kélishimini dawamlashturush qararini qarshi alidighanliqini, bu munasiwet bilen b d t bash katipi antoniyo gutérrés we jumhur reis erdoghanni tebrikleydighanliqini bildürdi.

ukraina ashliqini qara déngiz arqiliq dunya bazarlirigha bixeter yötkesh kélishimi jumhur reis erdoghan bilen b d t bash katipi gutérrésning ishtirak qilishi bilen, türkiye, b d t, rusiye, ukraina otturisida istanbulda imzalanghanidi.