tünügün istanbulda yüz bergen bomba hujumi üchün teziye uchurliri élan qilindi

türkiye awazi radiyosi xewiri: türkiye büyük millet mejlisi (parlaménti) reisi mustapa shentop teziyenamiside: «eziz millitimizdin hal soraymen. dölitimiz barliq alaqidar organliri bilen neq meydanda, partlashning tesirige uchrighan barliq xelqimiz we rayondiki dukandarlarni qollaydu» dédi.

muawin jumhur reis fuat oktay barliq organlarning heriketke ötkenlikini, zörür bolghan tekshürüshlerning inchikilik bilen élip bérilghanliqini éytti.

jumhur reislik bayanatchisi ibrahim kalin héchqandaq hujumning türkiyening iradisi we küchini buzalmaydighanliqini tekitlidi.

adalet we tereqqiyat partiyesi bayanatchisi ömer chelik: «bu qebih weqeni tughdurghuchilar we ularning alaqilashquchiliri choqum ashkarilinidu. türkiyeni hujum arqiliq yolidin burmilashqa urunuwatqanlar hergiz ghelibe qilalmaydu» dédi.

jumhur reislik uchur - alaqe idarisi bashliqi fahrettin altunmu ijtimaiy alaqe adrésida bayanat élan qilip: «puqralirimizgha qaritilghan térrorluq hujumliri bezi döletlerning térrorluq teshkilatlirigha qilghan yardemlirining biwasite we wasitiliq aqiwetliridur. eger bu döletler türkiyening dostluqini xalaydighan bolsa, térrorluq teshkilatlirini qollashni derhal toxtitishi kérek» dédi.

jumhuriyet xelq partiyesi reisi kamal kilichdaroghlu bayanatida, «térrorluq meyli qeyerdin kelgen bolushidin qetiynezer, lenet oqush mejburiyitimiz bar» dédi.

iyi (yaxshi) partiye reisi meral akshenermu bayanatida: «bu peskesh hujumni küchlük eyibleymen» dédi.