erdoghan: amérikadin bezi ijabiy xewerler kéliwatidu

türkiye awazi radiyosi xewiri: jumhur reis erdoghan özbékistanda chaqirilghan türk döletliri teshkilatining 9 – nöwetlik bashliqlar yighinidin kéyin muxbirlarning soallirigha jawab berdi؛ türkiyening amérikadin f-16 sétiwélish telipige munasiwetlik téxinikiliq xizmetlerning pilanlanghini boyiche dawamlishiwatqanliqini bildürgen erdoghan, «<bu ishni mushu shekilde élip mangayli, hel qilayli we buninggha munasiwetlik matériyallarni yépiwéteyli> déduq. amérika terep pat-patla alaqe ornitip, dölet mudapie ministiri xulusi (akar) pashagha ijabiy we chirayliq geplerni qiliwatidu. elwette, hazir ular bir saylamni bashtin kechürdi. bu saylam bilen bezi ijabiy xewerler kéliwatidu, biz bu ijabiy xewerlerni yéqindin közitiwatimiz. aldimizdiki ayning xush xewerlerge tolghan bolushini ümid qilimizki, f-16 mesilisini téximu ijabiy yönilish boyiche algha süreyli» dédi.

erdoghan, rosiye-ukraina urushi heqqide toxtilip: «biz ashliq karidoridin bir tinchliq karidori achalishimiz mumkin. buning eng yaxshi usuli söhbet arqiliq tinchliqqa yétish yolidur. waqit cheklimisi qoyush toghra emes. biz ulargha bu ishning mudditini qanche uzun qilsa, shunche toghra bolidighanliqini déduq» dégenlerni qeyt qildi.

u, shimaliy qibris türk jumhuriyitining türk döletliri teshkilatining küzetküchi ezaliqigha qobul qilinishi mesilisi heqqide bolsa: «biz aldi bilen, ul eslihe xizmitini bashlap, andin shimaliy qibrisni dölet süpitide dunyagha étirap qildurush üchün burulushimiz kérek» dédi.

türkiyening yéqinqi 20 yilda dunyaning herqaysi jayliridiki krizislargha qarita réal, teshebbuskar, insaniy we milliy tashqi siyaset yürgüzgenlikini tilgha alghan erdoghan: «biz hem heq - hoquqimiz we menpeetimizni qoghdiduq, hem yer shari we rayonning tinchiliq we muqimliqi üchün estayidil küch serp qilduq. shukurki, tirishchanliqimiz sayisida türkiye hazir dunyawi mesililerde sözige qulaq sélinidighan, hörmetke sazawer we kem bolsa bolmaydighan bir küchke aylandi. buni dunya jamaitimu étirap qildi» dédi.