qalin CNN ning ashliq karidori toghrisidiki soallirigha jawab berdi
türkiye jumhuriyiti jumhur reislik mehkimisi bayanatchisi ibrahim qalin, CNN International qanilining ashliq karidori toghrisidiki soallirigha jawab berdi.
türkiye awazi radiyosi xewiri: türkiye jumhuriyiti jumhur reislik mehkimisi bayanatchisi ibrahim qalin, jumhur reis rejep tayyip erdoghanning rusiye pirézidénti wiladimir putin bilen ötküzgen téléfon söhbitidin kéyin, ashliq karidorigha munasiwetlik saqliniwatqan barliq mesililerning normal haletke qaytqanliqini bildürdi.
türkiye jumhuriyiti jumhur reislik mehkimisi bayanatchisi ibrahim qalin, CNN International qanilining 22-iyul rusiye bilen ukraina otturisida istanbulda imzalanghan ashliq karidori kélishimi toghrisidiki soallirigha jawab bérip, 10-ayning 29-küni moskwaning, rusiye igiliwalghan ukrainaning qirim yérim arilining séwastopol shehiridiki bir paraxot hujumgha uchrighandin kéyin ashliq kélishimini ijra qilishni waqtinche toxtatqanliqini jakarlighanliqigha isharet qilip ötti.
u, ashliq mesilisining urushtin ayrim ehwal ikenlikini tekitlep: «biz yéqinqi 3-4 kün ichide nurghun diplomatik tirishchanliq körsettuq. jumhur reis erdoghan bilen putin otturisidiki téléfon söhbitidin kéyin, rusiye kélishimge qaytip keldi, hazir hemme ishlar öz yolida dawam qilmaqta» dédi.
jumhur reis erdoghanning ukraina pirézidénti wiladimir zélénskiy bilenmu téléfon söhbiti ötküzgenlikini bildürgen qalin, zélénskiyningmu kélishimge sadiq qalidighanliqi toghrisidiki wedisini jezmleshtürgenlikini éytti.
u, ashliq kélishimini saqlap qélish we rusiyening ashliq we oghuti üchün bezi kapaletlerni bérishning zörürlükini otturigha qoyup, buning rusiyening urush pilanini testiqlashtin dérek bermeydighanliqini tekitlidi.
bayanatchi ibrahim qalin, söhbet üstilige qaytishning zörürlükining her ikki terepke yetküzülgenlikini tilgha élip, bu arqiliq nurghun kishining ölümi we yer – zéminlarning qoldin kétishining aldini alghili bolidighanliqini bildürdi.
u, putin bilen ötküzülgen uchrishishlarda, rusiyening yadro qorali ishlitish niyiti yoqluqining bildürülgenlikini, ukrainaning paskina bomba we ximiyilik qorallarni ishlitishke teyyarliq qiliwatqanliqi toghrisidiki eyibleshlerni zélénskiyning ret qilinghanliqini sözlirige ilawe qildi.
