erdoghan: «türkiye esiri» ni pilanlawatimiz

türkiye awazi radiyosi xewiri: jumhur reis rejep tayyip erdoghan, chanaqqele aywajiq – küchükquyu yoli, assos we troya tunéllirini xizmetke kirishtürdi.

échilish murasimigha jumhur reislik mehkimisidin widéo konférans wasitisi arqiliq qatnashqan erdoghan, bu yerde qilghan sözide, mundaq dédi: «hazir biz xizmetke kirishtürüwatqan aywajiq – küchükquyu yoli arqiliq, ilgiriki 50 minutluq yol 5 minutqa qisqiraydu, bu sayida biz hem waqit, hem yéqilghu, hemde bulghima qoyup bérishtin téjep qalidighan meblegh, yiligha 133 milyon liragha toghra kélidu.»

erdoghan, usta bir shahmat mahirining talanti arqiliq döletning kéyinki esirni pilanlawatqanliqlirini tekitlep mundaq dédi: «türkiye jumhuriyitining (29 – öktebir)  100 – yilliq xatire künini adettiki tebriklesh paaliyetliridin perqiliq halda <türkiye esiri> pilani arqiliq tebrikleshke teyyarliniwatimiz. biz ilgiri xelqimizni 2023 nishanimizning upuqi dairiside qandaq bir gewdileshtürgen bolsaq, hazirmu <türkiye esiri> pirogrammimiz bilen 2053-yilliq istiratégiyelik nishanimizning ulini tikleshke bashlawatimiz.»

u, yéqinqi 20 yilda, türkiyeni dunyadiki eng chong döletler qatarigha kirgüzüsh üchün zörür ul eslihe qurulushlirini berpa qilghanliqlirini, aywajiq – küchükquyu yoli, assos we troya tunélliridin sirt yene, yéngi bir muhim bir xizmetnimu ishqa kirishtürgenliklirini  eskertip mundaq dédi: «bir tereptin, biz xizmet we mulazimet siyasitimizning mehsuli bolghan bu layihelerning hemmisini berpa qilish we xizmetke kirishtürüshni dawamlashturuwatimiz. yene bir tereptin, biz yéngi istiratégiyelik pilan tüzüp, bu dairide qedem tashlawatimiz. bu pilan, türkiyediki her bir sheher ahalisini, xelqimizning her bir ezasini, barliq dostlirimiz we qérindashlirimizni arzu – armanlirigha yetküzidu hem teleplirini qanduridu. biz daim éytqinimizdek, <türkiye hergizmu dölet chégraliri bilenla cheklinidighan bir dölet emes>. qelb chégralirimiz, ejdadlirimizning bizge tonushturghinidek, <üch qite we yette iqlim» dek payansizdur.»