erdoghan: süriye bilen yuqiri derijilik qedemler bésilishi kérek

türkiye awazi radiyosi xewiri:jumhur reis rejep tayyip erdoghan tünügün (18-awghust) ukrainadiki bir künlük ziyaritini axirlashturup türkiyege qaytish sepiride, muxbirlarning soallirigha jawab berdi.

u türkiyening shimaliy süriyediki térrorluqqa qarshi kürishini rusiye bilen birlikte élip bériwatqanliqini bildürüp: «térrorluqqa qarshi küreshning bir qismini ruslar bilen birlikte qiliwatimiz, yene bir qismini özimizning qoralliq qisimlirimiz we xewpsizlik küchlirimiz bilen qiliwatimiz» dédi.

u süriyede térrorluqni birinchi derijide béqiwatqan döletning amérika ikenlikini, uningdin qalsa birleshme qisim ikenlikini eskertip: «buni rehimsizlerche qiliwatidu we hazirmu dawamlashturuwatidu» dédi.

u mundaq dédi:

«biz bikardin bikar <bir kéche ushtumtut basturup barimiz> démeymiz. waqti yétip kelgende déginimizni emelge ashurimiz. emma, shunimu dep qoyushum kérek, héchkim türkiyedin heriket bashlashqa teyyarmu sen dep sorimisun. bizning teyyarliqimiz toluq, teyyar bolghandin bashqa, néme qilish kérek bolsa shuni qilghudek küchimiz bar.»

u amérikaning iraqtimu térroristlarni qollawatqanliqini bildürüp: «eger pütkül iraqta xatirjemsizlik bar déyilse, nahayiti epsuski uning keynidin amérika chiqidu. bu térrorluq teshkilatlirining kattibashlirini aqsarayda kütüwélishtek heriketler bilen mesilini téximu yoghinatti. biz bularning hemmisini bilimiz» dédi.

u türkiyening süriyening zéminida közi yoqluqini tekitlep: «bizning esedni yingish derdimiz yoq. türkiyening süriyening zéminida közi yoq, chünki süriye xelqi bizning qérindishimiz. u yerlerde bizning bundaq derdimiz yoq. ularning zéminlirining bir pütünlüki biz üchün muhim ehmiyetke ige. beshshar esed hakimiyiti bularni chüshinishi kérek» dédi.

u döletler otturisida héchqachan siyasiy diyalog yaki diplomatiyeni üzüwétishke bolmaydighanliqini bildürüp: «her daim bu xil diyaloglar bolidu we bolushi kérek» dédi.