chawushoghlu: türkiye – shiwétsiye – finlandiye mixanizm yighini chaqirilidu
tashqi ishlar ministiri mewlüt chawushoghlu 26-awghust küni türkiye - shiwétsiye - finlandiye mixanizm yighini chaqirilidighanliqini éytti.
türkiye awazi radiyosi xewiri: chawushoghlu, tünügün paytext enqerede ötküzülgen 13-nöwetlik bash elchiler konféransining axirqi küni yépilish sözi qildi.
shiwétsiye bilen finlandiyening shimaliy atlantik ehdi teshkilatigha ezaliqi musapisi toghruluq bu döletler bilen üch tereplik kélishim layihesi imzalanghanliqini eskertken chawushoghlu, tereplerning mezkur höjjet we bayanatlirida bergen wedisini téxi orundimighanliqini, hemde ularning bu yönilishte qedem tashlighanliqini körmigenliklirini bayan qildi.
chawushoghlu, gerche shiwétsiye bilen finlandiye bayanatlarni élan qilghan, munasiwetlik dairiler yaxshi niyetlik ikenliklirini otturigha qoyghan bolsimu, emma türkiyening bu ikki dölettin ijabiy qedem tashlishini kütüwatqanliqini herdaim otturigha qoyup kéliwatqanliqini qeyt qildi.
mezkur kélishim layihesige asasen tashlinidighan ijabiy qedemlerni közitish üchün shiwétsiye bilen finlandiyening teklipige binaen bir mixanizm ornitilghanliqini éytqan ministir chawushoghlu, mundaq dep körsetti: «iyul éyidimu bir yerge jem bolush teklipini otturigha qoyduq, chünki biz qandaq qedemlerning tashlanghanliqini, qandaq qedemlerning tashlanmighanliqini, némishqa tashlanmighanliqini körüshni xalaymiz, emma biz üchün waqit bésimi yoq. elwette térrorizmgha qarshi küreshte (waqit bésimi) bar, lékin shimaliy atlantik ehdi teshkilatigha eza bolushni xalaydighanlar ene shulardur. ularmu awghust éyida bir yerge jem bolush teklipini sundi, xudayim buyrisa, bu méxanizimning tunji yighini 26-awghust küni ötküzülidu.»
