altun: shiwétsiye aldi bilen bizni qayil qilishi kérek
jumhur reislik mehkimisi uchur - alaqe ishliri idarisining bashliqi fahrettin altun shiwétsiyening «térrorchilarning panah jayliridin shiwétsiyege ait qoral – yaraghlarning chiqmaydighanliqi» toghruluq türkiyeni qayil qilishi lazimliqini éytti.
türkiye awazi radiyosi xewiri: jumhur reislik mehkimisi uchur - alaqe ishliri idarisining bashliqi fahrettin altun shiwétsiyening shimaliy atlantik ehdi teshkilatigha ezaliq mesiliside «térrorchilarning panah jayliridin shiwétsiyege ait qoral – yaraghlarning chiqmaydighanliqi» toghruluq türkiyeni qayil qilishi lazimliqini éytti.
altun, shiwétsiyening eng nopuzluq gézitliridin «‹ Svenska Dagbladet› géziti» ning, shiwétsiyening shimaliy atlantik ehdi teshkilatigha ezaliq üchün iltimas sunushigha munasiwetlik soallirigha jawab berdi.
shiwétsiyening shimaliy atlantik ehdi teshkilatigha ezaliq üchün sunghan iltimasining, ikki türlük heqiqetni namayen qilip bergenlikini qeyt qilghan altun, aldi bilen bölgünchi térrorluq teshkilati p k k ning shiwétsiyede qanchilik derijide küchlük ikenlikining körülgenlikini, bu teshkilat ezalirining parlaméntning arifmétikasi sewebidin shiwétsiye hökümitige tehdit salghanliqini we bu teshkilatqa payda yetküzüsh üchün barliq waqtini serp qilghanliqlirining bu arqiliq otturigha chiqqanliqini qeyt qildi.
türkiyening eneniwi shekilde shimaliy atlantik ehdi teshkilatining «ochuq ishik» siyasitini qollap kéliwatqanliqini eskertken altun, birawni xushal qilish üchün térrorizm mesiliside héchkimge yol qoymaydighanliqlirini qeyt qildi.
shiwétsiyening shimaliy atlantik ehdi teshkilatigha eza bolush üchün melum ölchemlerge riaye qilishi kéreklikini éytqan altun, bolupmu shimaliy atlantik ehdi teshkilatining térrorizmgha qarshi küresh mesilisige intayin jiddiy qaraydighanliqini tekitlep mundaq dédi: «uning üstige, shiwétsiyening shimaliy atlantik ehdi teshkilatigha kirishige yéshil chiragh yéqish, birer hujum yüz bergende 5-madda dairiside shiwétsiye xelqini qoghdashqa wede bérish, dégen uqumni bildüridu. eger biz shiwétsiye üchün bundaq mesuliyetni üstimizge almaqchi bolsaq, dölitimizde yighilghan pullar arqiliq türkiye puqralirigha hujum qilinmaydighanliqi, süriye yaki iraqtiki térrorchilarning panah jayliridin shiwétsiyege ait qoral – yaraghlarning chiqmaydighanliqi toghruluq shiwétsiye bizni qayil qilishi lazim.»
