erdoghan kolombiye pirézidénti bilen körüshti
jumhur reis rejep tayyip erdoghan türkiyede dölet ishliri ziyaritide boluwatqan kolombiye pirézidénti iwan duk markuz bilen körüshti.
türkiye awazi radiyosi xewiri: jumhur reislik mehkimisining «dolmabahche sariyi» diki ishxanisida ishqa ashurulghan uchrishishta, türkiye – kolombiye munasiwetliri keng dairilik közdin kechürüldi, hemkarliqni kücheytish üchün tashlinidighan qedemler heqqide muzakire élip bérildi, hemde mewjut rayonluq we xelqaraliq mesililer heqqide özara pikir almashturuldi.
jumhur reis erdoghan, uchrishishtin kéyin ötküzülgen qoshma axbarat élan qilish yighinida, mundaq dédi: «biraz burun biz imzalighan ortaq bayanname arqiliq döletlirimiz otturisidiki munasiwetlerni <istiratégiyelik hemrahliq> sewiyesige yetküzduq. istiratégiyelik aliy hemkarliq kéngishi méxanizmi sayisida munasiwetlirimizni ikki yil ichide dölet bashliqliri süpitide ishqa ashurulidighan uchrishishlar arqiliq eng yüksek sewiyege yetküzimiz.»
kolombiyening, türkiyening biraziliyedin qalsa latin amérikadiki eng chong ikkinchi soda shériki ikenlikini qeyt qilghan erdoghan, 2021 – yili kolombiye bilen bolghan soda omumiy sommisining ikki hesse yüksilip, 2 milyard dollardin ashqanliqini tekitlep mundaq dédi: «nishanimz ikki dölet otturisidiki soda omumiy sommisini 5 milyard dollargha yetküzüshtur.»
