rize – artwin  ayrodurumi xizmetke kirishtürüldi

türkiye awazi radiyosi xewiri: jumhur reis erdoghan bilen ezerbeyjan pirézidénti ilham eliyéw olturghan ayropilanlar, rize – artwin ayrodurumida qarshi élindi.

ilham eliyéw ayropilandin chüshkende qarshi alghan jumhur reis erdoghan, kéyinche eliyéw bilen birlikte échilish murasimi sahesige ötti.

erdoghan, échilish murasimida qilghan sözide, dunyada déngiz boyigha qurulghan jemiy 5 ayrodurum barliqini, bulardin ikkisining rize – artwin ayrodurumi bilen birlikte türkiyede ikenlikini, bu arqiliq türkiyediki omumiy ayrodurum sanini 26 din 57 ge yetküzgenliklirini éytti.

texminen 5 yilda 4.4 milyard liraliq meblegh sélinip tamamlanghan rize – artwin ayrodurumining, 3000 métirliq uchush yoli, yilliq 3 milyon yoluchi sighidighan términali, yardem qisimliri we bashqa mulazimetliri bilen pexirlinerlik bir qurulush ikenlikini tekitligen erdoghan, qaradéngizning sharaiti murekkep jughrapiyeside berpa qilinghan bu ayrodurumning, qoshna dölet giruziyening tiransportighimu qulayliq yaritip béridighanliqini eskertip mundaq dédi: «biz dölitimiz chégralirining eng chétide qurghan bu ayrodurum, xelqimizge waqittin tartip yéqilghughiche, qatnash weqeliridin tartip bulghima qoyup bérishni azaytishqiche bolghan nurghun sahelerde töhpe qoshidu. bu térrotériyelerde yashawatqanlar we ziyaretke kelgenlerdin sirt yene, bu rayonning güzelliklirini körüshni xalaydighanlarning hemmisige, rize bilen artwin buningdin kéyin bir ayropilan bélitichilik yéqindur.»

bu ariliqta, rize – artwin ayrodurumigha tunji yoluchilar ayropilanimu qondi.

istanbul ayrodurumidin enqere waqti etigen saet 08.30 da qozghalghan türkiye hawa yolliri shirkitige ait « TK 2538 » tipliq yoluchilar ayropilani,  etigen saet 10.35 de rize – artwin ayrodurumigha qondi.

ayropilandiki yoluchilar, qatnash we qurulush ishliri ministiri adil qaraismailoghlu bilen birlikte sahede turuwatqan kishiler teripidin güller arqiliq qarshi élindi.