erdoghan: ötmüshtin salghan köwrükni kücheytish arqiliq yolimizni dawamlashturimiz
türkiye jumhur reisi rejep tayyip erdoghan türkiye-qazaqistan munasiwetliri üstide toxtilip: «biz ötmüshtin salghan köwrükni kücheytish arqiliq yolimizni dawamlashturimiz» dédi.
türkiye awazi radiyosi xewiri: rejep tayyip erdoghan dölet ishliri ziyaritide bolush üchün paytext enqerege yétip kelgen qazaqistan pirézidénti qasim jömert toqayéw bilen bir qatar kélishimlerni imzalighandin kéyin, birlikte axbarat élan qilish yighini ötküzdi.
u bu yilning (2022) qazaqistan bilen diplomatik munasiwet ornitilghanliqning 30-yili ikenlikini xatiriletken halda: «hörmetlik toqayéwning yéngi qazaqistan qurush yolidiki tirishchanliqi maxtashqa erziydu. biz her qandaq shert-sharait astida qazaqistanliq qérindashlirimizni qollaymiz, ötmüshtin salghan köwrükni kücheytish arqiliq yolimizni dawamlashturimiz. türkiye-qazaqistan soda omumiy sommisi %58 éship 5.3 milyard dollargha yetti. inshaallah bu reqemni birlikte basidighan qedemler bilen 10 milyard dollargha chiqirish nishanigha yétimiz. texminen 19 milyon nopusi bar qazaqistan bilen 85 milyon nopusqa ige türkiyening özara hemkarliqi intayin muhim» dédi.
sözini jumhur reis rejep tayyip erdoghangha muqeddes anadolu tupraqlirigha resmiy teklip qilghanliqi üchün teshekkür éytish bilen bashlighan qazaqistan pirézidénti qasim jömert toqayéw: «biz bügün (2022-yili 10-may) bir qanche mesile boyiche intayin muhim keng dairilik muzakirelerni ötküzduq. hörmetlik jumhur reis rejep tayyip erdoghan bilimlik we hörmetke sazawer siyasetchidur. bu sewebtin uning pikiri intayin qimmetlik. qazaqistan bilen türkiye yiltizi bir qérindash we dost döletler hésablinidu. türkiyedin bizge héchqandaq yamanliq kelmidi, belki her daim yaxshiliq körduq. bügüngiche mushundaq boldi we mushundaq bolidu» dédi.
