altun: türkiye rayonluq pewquladde özgirishler aldida muhim rol oynimaqta
jumhur reislik mehkimisi uchur - alaqe ishliri idarisining bashliqi fahrettin altun türkiyening rayonluq pewquladde özgirishler aldida tertip ornatquchi süpitide muhim rol oynawatqanliqini éytti.
türkiye awazi radiyosi xewiri: altun, türkiyening süriye kirizisini öz ichige alghan rayonidiki pewquladde özgirishler aldida aktip, muqimliq saqlighuchi we tertip ornatquchi süpitide muhim rol oynawatqanliqini éytti.
altun, ammiwi ortaqlishish tor bétidiki sehipiside élan qilghan bayanatida, türkiyening hem özining bixeterlikini kapalet astigha éliwatqanliqini hemde emeliyetchil we insanperwerlik asasida köchmenler siyasitini yolgha qoyuwatqanliqini, bu basquchta jumhur reis rejep tayyip erdoghanning rehberlikide, térrorizmni öz menbeside üzül - késil yoqitish istiratégiyesining yolgha qoyuluwatqanliqini, bu dairide nurghun muweppeqiyetlik chégra halqighan herbiy heriketlerning élip bérilghanliqini tekitlep mundaq dédi: «türkiye bu herbiy heriketlerni bir tereptin, térrorluq teshkilatliri we ularning himayichilirige qarshi küresh qilish, yene bir tereptin, chégralirimizning qarshi terepliride tinchliq karidori ornitish üchün élip barmaqta. chégra sirtida azad qilinghan rayonlargha hazirghiche 500 ming süriyelik qaytti. shuni alahide tekitlep ötimenki, jumhur reisimiz rejep tayyip erdoghanning rehberlikide, ichki ishlar we dölet mudapie ministirliqlirimizni öz ichige alghan barliq organlirimiz dölet ichi - sirtida köchmenlik mesilisini yéqindin közetmekte, tégishlik zörür tedbirlerni qollanmaqta, herqandaq shekildiki qalaymiqanchiliqqa esla yol qoymaywatmaqta. türkiye jumhuriyiti qudretlik bir dölettur. aldi bilen, bir tereptin, öz puqralirimizning bixeterlikini qoghdap, parawanliqini yenimu yüksek sewiyege yetküzüsh üchün, yene bir tereptin, rayonluq küch ornimizni mustehkemlep, yer shariwi aktiyor bolush yolida ghelibiséri algha qedem tashlaymiz.»
