erdoghan: «penje – qulup» herbiy herikiti p k k ning jan talishiwatqanliqini bildüridu
jumhur reis rejep tayyip erdoghan iraqning shimalida bölgünchi térrorluq teshkilati p k k gha qarshi élip bériliwatqan «penje – qulup» herbiy herikitining térrorluq teshkilatining jan talishiwatqanliqini bildüridighanliqini éytti.
türkiye awazi radiyosi xewiri: jumhur reis erdoghan, istanbulda axbarat wasitilirigha élan qilghan bayanatida, 18 – aprél küni bashlanghan «penje – qulup» herbiy herikiti toghruluq toxtilip mundaq dédi: «nöwette iraqning shimalida dawamlishiwatqan ‹penje – qulup› herbiy herikiti bölgünchi térrorluq teshkilati p k k ning jan talishiwatqanliqini bildüridighan muhim bir herikettur. derweqe, bölgünchi térrorluq teshkilati p k k mu nöwette eng axirqi qétim jan taliship, bolupmu qendil rayonidin kelgen buyruq boyiche weyran qilish xaraktérlik térrorluq paaliyetlirini élip bérishqa urunuwatidu. ‹penje – qulup› herbiy herikiti dawamida hazirghiche bir terep qilinghan térrorchilarning sani 45 ke yetti. tolimu epsuski, bu jeryanda 1 eskirimiz shéhit boldi. shuning bilen, shéhitlirimizning sani 3 ke yetti. qandaq bolushidin qetiynezer, qehriman alahide qisimlirimiz térrorchilarning uwilirini yer bilen yeksan qilishni dawamlashturmaqta.»
«penje – qulup» herbiy herikitining barliq téxnologiyelerge tayinip élip bériliwatqanliqini tekitligen jumhur reis erdoghan, mundaq dep körsetti: «‹penje – qulup› herbiy herikiti taki térrorchilarni tazilash herbiy heriketliri axirlashqangha qeder üzlüksiz dawamlishidu. térrorizmgha qarshi kürishimizni adaqqiche dawamlashturimiz.»
erdoghan, ukraina – rusiye otturisidiki tinchliq söhbetlirige alaqidar bir soalgha jawab bergende, mundaq dédi: «tinchliq söhbetlirining netijisi ijabiy boluwatidu, lékin del biz arzu qilghan sewiyede emes. emma netijisi téximu yaxshi bolidu. biz ümidsiz emesmiz.»
