türkiye pirézidént zélénskiy bilen putinning uchrishishigha sahibxanliq qilishqa teyyar
türkiye jumhur reisi rejep tayyip erdoghan türkiyening ukraina pirézidénti wladimir zélénskiy we rusiye pirézidénti putinning uchrishishigha sahibxanliq qilishqa teyyar ikenlikini éytti.
türkiye awazi radiyosi xewiri: ukraina pirézidénti zélénskiyning teklipige binaen, türkiye - ukraina yuqiri derijilik istratégiyelik kéngishining 10-qétimliq yighinigha qatnishish üchün kiyéwgha yétip barghan jumhur reis erdoghan, pirézidént zélénskiy bilen marinskiy sariyida ayrim körüshti.
rehberlerning ayrim körüshüshidin kéyin, ikki dölet otturisida tüzülgen kélishimler üchün imza qoyush murasimi ötküzüldi. arqidin erdoghan bilen zélénskiy birlikte muxbirlarni kütüwélish yighini ötküzdi.
rejep tayyip erdoghan: «aridin ikki yil ötkendin kéyin istratégiyelik shérikimiz ukrainani ziyaret qilghanliqimdin xushalmen. qirimni öz ichige alghan halda ukrainaning zémin pütünlükini qollaydighanliqimizni tekrar éytishni xalaymen. türkiye pirézidént zélénskiy bilen putinning uchrishishigha sahibxanliq qilishqa teyyar» dédi.
u türkiyening qaradéngizda qoshna bolghan ikki dost dölet otturisidiki kirizisning axirlishishi üchün zimmisige chüshken wezipisini ada qilishqa teyyar ikenlikini tekitlidi.
u zélénskiy bilen ikki dölet otturisidiki soda omumiy sommisini 10 milyard dollar nishanigha chiqirish üchün tashlash mumkin bolghan qedemlerge qarap chiqqanliqlirini bildürüp: «imzalighan kélishimler istratégiyelik shériklikimizni téximu yuqiri sewiyege chiqirish iradisining simwolidur» dédi.
ukraina pirézidénti wladimir zélénskiy: «bügün imzalanghan kélishimler, baykar uchquchisiz hawa apparatini ukrainada ishlepchiqrishni kéngeytidu. zémin pütünlükimizni qollighanliqi üchün türkiyege we jumhur reis rejep tayyip erdoghangha teshekkür éytimen. urushni axirlashturush yolida, türkiyening ukraina-rusiye otturisidiki muressechilik roli üchünmu teshekkür éytimiz» dédi.
