erdoghan ukrainani ziyaret qilidu
jumhur reislik mehkimisining bayanatchisi ibrahim kalin rejep tayyip erdoghanning bir qanche hepte ichide ukrainani ziyaret qilidighanliqini éytti.
türkiye awazi radiyosi xewiri: jumhur reislik mehkimisining bayanatchisi ibrahim kalin rejep tayyip erdoghanning ukraina ziyaritide pirézdént wladimir zélénski bilen körüshidighanliqini bildürdi.
u «sirkul fondi» (Circle Foundation) teripidin intérnét torida uyushturulghan «rusiye-ukraina jiddiychilikining yawropa we natogha körsitidighan tesirliri» témiliq yighinda söz qildi.
u rusiyening ukrainagha herbiy heriket bashlighanda, netijilirining keynige yanduruwalghili bolmaydighan derijide nahayiti éghir bolidighanliqini eskertip, türkiyening mesilini hel qilish üchün her türlük rolni üstige élishqa teyyar ikenlikini qeyt qildi.
u mesilining xéli waqittin béri küntertipte ikenlikini we jiddiychilikning ulghiyiwatqanliqini bildürüp, türkiyeningmu weziyetni endishe ichide közitip turuwatqanliqini we bu jiddiychilikning nurghun xeterlerni peyda qilghanliqini éytti.
u mundaq dédi:
«ukrainaning zémin pütünlükini, siyasiy igilik hoquqini we ijtimaiy pütünlükini toluq qollaymiz.»
u enqerening yéngi urushni körüshni xalimaydighanliqini؛ kishilerning süriyede, iraqta we dunyaning her qandaq jaylirida urushning yéterlik körgenlikini eskertip, her ikki terepke salmaq bolushni chaqiriq qildi.
u türkiyening mesilini hel qilish üchün tirishchanliq körsitiwatqanliqini üstide toxtilip, jumhur reis rejep tayyip erdoghanning hem rusiye pirézidénti putin hemde ukraina pirézidénti wladimir zélénski bilen söhbetleshkenlikini bildürdi.
u mundaq dédi:
«rejep tayyip erdoghan hetta xalisa her ikki rehberni türkiyege kélishke, otturidiki mesililerni we oxshimasliqlarni hel qilish üchün yighin uyushturushqa teklip qildi. türkiye, rusiye-ukraina otturisidiki jiddiychilikni peseytish üchün her türlük rolni oynashqa teyyar. buni hem rusiye hemde ukrainaning dosti, shundaqla nato ittipaqdishi bolush süpitimiz bilen qiliwatimiz» dédi.
u jumhur reis rejep tayyip erdoghanning bir qanche hepte ichide ukrainani ziyaret qilip, pirézidént zélénski bilen körüshidighanliqini bildürüp: «oxshash waqitta, netijiliri éghir bolidighan we keynige yanduruwalghili bolmaydighan her türlük herbiy herikettin yiraq turush üchün rusiye bilen yéqin alaqide bolimiz» dédi.
