chawushoghlu: nishanimiz afriqa bilen birlikte ghelibe menzilgahigha yétish
tashqi ishlar ministiri mewlüt chawushoghlu nishanlirining afriqaliq dostliri bilen birlikte algha ilgirilesh, hemkarliqni yenimu yüksek sewiyege yetküzüsh we ghelibe menzilgahigha yétish ikenlikini bildürdi.
türkiye awazi radiyosi xewiri: chawushoghlu, istanbulda chaqirilghan 3 - nöwetlik türkiye – afriqa elliri hemrahliq bashliqlar yighinining ministirlar olturushida qilghan sözide, «kowid – 19» yuqumigha qarimay yighin ishtirakchilirining nahayiti köplükidin intayin xursen ikenliklirini tekitlep mundaq dédi: «yighin ishtirakchilirining köp bolushi, eslide afriqa elliri bilen bolghan munasiwetlirimizning nöwette intayin mustehkem ikenlikining namayendisidur.»
bu yilqi yighinning témisining, «birlikte tereqqiy qilish we parawanliq üchün küchlük hemrahliq» ikenlikini eskertken chawushoghlu, mundaq dep körsetti: «nishanimiz afriqaliq dostlirimiz bilen birlikte algha ilgirilesh, hemkarliqni yenimu yüksek sewiyege yetküzüsh we ghelibe menzilgahigha yétishtur. biz afriqa elliri bilen bolghan munasiwetlirimizge istiratégiyelik we uzaq mezgillik nishan nuqtisidin qaraymiz, jumhur reisimiz rejep tayyip erdoghan, 30 afriqa dölitige 50 qétim ziyarette boldi, shuning bilen, afriqada eng köp ziyarette bolghan rehberlerdin biri bolup qaldi.»
türkiyening barliq ministirliqliri we ammiwi teshkilatlirining afriqaning tereqqiy qilish tirishchanliqlirini pütün küchi bilen qollawatqanliqini éytqan chawushoghlu, mundaq dédi: «türkiye hawa yolliri shirkiti, türkiye – afriqa otturisida dostluq köwrüki bolupla qalmastin, yene afriqani pütkül dunyagha tutashturmaqta, türk meblegh salghuchilar afriqaning herqaysi jaylirida öchmes izlarni qaldurmaqta.»
