jumhur reis erdoghan qatargha qarap yürüp ketti
jumhur reis erdoghan paytext dohada qatar emiri sheyx temim bin hemed alsani teripidin resmiy murasim arqiliq qarshi élinidu.
türkiye awazi radiyosi xewiri: jumhur reis erdoghan, qatargha qarap yolgha chiqish harpisida, istanbulda atatürk ayrodurumida ötküzgen axbarat élan qilish yighinida, dostluq we istiratégiyelik nuqtiinezerge asaslinidighan türkiye – qatar munasiwetlirining künséri tereqqiy qiliwatqanliqini, bu heqte yéqinqi yillarda közge körünerlik derijide muweppeqiyetlerning qolgha keltürülgenlikini eskertish bilen bir waqitta, türkiye bilen qatarning öz meydanlirida izchil ching turup kéliwatqanliqini, ikki dölet otturisidiki hemkarliqni, iqtisadtin dölet mudapiesigiche, soda – iqtisadtin sélinmighiche «hemme terep qazinish» asasida kücheytiwatqanliqlirini, qatardin sirt yene, paris qoltuqidiki bashqa döletlermu bilenmu hemkarliqni kücheytish yolida tirishchanliq körsitiwatqanliqlirini tekitlep mundaq dédi: «paris qoltuqida diyalog ishiklirining qayta échilishi we xata chüshiinip qélish ehwallirigha xatime bérilishi yolida dawamlashturuluwatqan diplomatik tirishchanliqlardin intayin xursenmiz, türkiye bolush süpitimiz bilen, paris qoltuqidiki döletler bilen bolghan hemkarliqimiz, hemrahliqimiz we buningdin kéyinki munasiwetlirimizning yenimu yüksek sewiyege yetküzülüshini xalaymiz.»
jumhur reis erdoghan, axbarat élan qilish yighinidin kéyin, qatargha qarap yolgha chiqti.
erdoghan, paytext dohada qatar emiri sheyx temim bin hemed alsani teripidin resmiy murasim arqiliq qarshi élinidu.
ikki rehber, murasimdin kéyin, ayrim körüshidu. türkiye-qatar munasiwetlirining barliq saheliri boyiche muzakire élip bérilidighan uchrishishta, afghanistan, süriye we liwiye mesililirini öz ichige alghan rayonluq özgirishler üstide özara pikir almashturulidu.
jumhur reis erdoghanning qatar ziyariti jeryanida, mewjut hemkarliqni kücheytidighan qedemlermu tashlinidu.
bu dairide, 7 – nöwetlik türkiye-qatar istiratégiyelik aliy hemkarliq kéngishi yighini chaqirilidu.
ikki dölet otturisida, tunji qétim 2015 – yili chaqirilghan kéngesh yighinliri netijiside, soda – iqtisadtin énérgiyegiche, dölet mudapiesidin sanaetkiche köpligen sahelerde 62 kélishim imzalanghanidi.
erdoghan bilen alsani riyasetchilik qilidighan 7 – nöwetlik türkiye-qatar istiratégiyelik aliy hemkarliq kéngishi yighindimu türlük kélishimler imzalinidu.
