chawushoghlu ukraina diplomatiye ministiri bilen qoshma axbarat élan qilish yighini ötküzdi

türkiye awazi radiyosi xewiri: chawushoghlu, bu yerde qilghan sözide, firansiye pirézidénti émmanuél makronning aljiriye mesiliside türkiyeni eyibligen sözlirige naraziliq bildürüp mundaq dédi: «yéqindin buyan firansiyening özining mustemlikichilik tarixi bilen yüzleshmekchi boluwatqanliqini körüwatimiz, biz buni qarshi alidighanliqimizni alliburun bildürgeniduq. shuni alahide tekitlep ötimenki, yéqindin buyan tarixiy mesililerde xata tehliller we burmilashlar otturigha chiqiwatidu, bu heqte firansiyening qanchilik derijide semimiy ikenlikige qarita gumaniy qarashlar köpiyishke bashlidi, bolupmu firansiyening, tarixida mustemlikichiliktek qara dagh bolmighan türkiyeni bundaq bimene talash – tartishlargha daxil qilishi tolimu xata, derweqe, aljiriyemu bu heqte firansiyege tégishlik jawab qayturdi.»

jumhur reis rejep tayyip erdoghanning makron bilen, öziningmu firansiye diplomatiye ministiri bilen axbarat wasitilirining wasitisi arqiliq emes, biwasite söhbet ötküzüsh mesiliside birdeklik hasil qilghanliqlirini tekitligen chawushoghlu, mundaq dep körsetti: «bu nuqtidin élip éytqandimu bu bayanatlarni toghra dep qarimaymiz, nöwette firansiye saylam basquchigha kirip qaldi, shunga saylam sewebidin makron mushundaq qiliwatidu, dep qaraymiz. halbuki, meyli firansiyede bolsun, meyli bashqa döletlerde bolsun, bundaq ehmiyetsiz söz – heriketlerning saylamlardimu paydisi yoqluqini kördüq we körüwatimiz, shu wejidin, makronning, héchnémige esqatmaydighan bundaq modigha aylinip ketken bimene tedbirlerni qollinishning ornigha, öz xelqining ishenchisige érishish üchün tedbir qollinishi téximu paydiliq, dep qaraymiz, eger makronning biz toghruluq deydighan bir gépi bolsa, arqimizdin emes, biwasite yüzimizge déyishi kérek, xuddi jumhur reisimiz rejep tayyip erdoghangha oxshash.»