qalin: amérika bilen rusiyening heqqi bolsa, bizningmu heqqimiz bar

türkiye awazi radiyosi xewiri: ibrahim qalin gérmaniyening «Der Spiegel» zhurniligha bayanat bérip, amérika bilen türkiyening térrorluqqa qarshi turush saheside hemkarlishiwatqanliqini, emma amérikaning p k k térrorluq teshkilatining süriyediki gumashtisi bolghan y p g ni qollash qatarliq mesililerde türkiyening éhtiyajini pat - patla nezerdin saqit qilip kéliwatqanliqini, buni qobul qilishning mumkin emeslikini eskertti.

ibrahim qalin amérika pirézidénti jo baydinning y p g  ning türkiye teripidin dölet tehditi dep qarilidighanliqini chüshinelmigenlikini qeyt qildi.

qalin yawropaliqlarning süriyege munasiwetlik mesililerde bir bulungda qarap turmay, hakimiyetke téximu köp bésim ishlitishini, bu arqiliq dunyaning süriyeliklerdin yüz örümeydighanliqini namayan qilishi kéreklikini otturigha qoydi.

yawropadiki bir qisim döletlerning türkiyening süriye siyasiti toghrisidiki tenqidliriigimu jawab bergen qalin: «türkiye eskerliri idlibta bolghachqila, 2 milyon 500 ming kishi bu rayondin qachmaywatidu. gherbtiki dostlirimiz bizge biz xuddi ishghaliyetchidekla muamile qilmaqta. biz süriye zéminigha köz tikmiduq. lékin bu qedemni hem özimizning bixeterliki hemde rayondiki süriyeliklerning bixeterliki üchün tashlashqa mejbur iduq» dédi.

u türkiyening süriyede xelqara qanungha xilapliq qilghanliqi toghrisidiki eyibleshlerni ret qilip: «bizning u yerde özimizni qoghdash hoquqimiz bar, eger rusiye bilen amérika qoshma ishtatlirigha süriyege kirish hoquqi bérilgen bolsa, bizning bu hoquqimiz bar» dédi.

afghanistanning talibandin kéyinki weziyiti toghrisidimu toxtalghan ibrahim qalin, türkiyening kabul ayrodurumining qayta échilishi üchün afghanistan hökümitini qollashni xalaydighanliqini éytti.

talibanning téximu sighdurushchan bir hökümet teshkillishining ümid qiliniwatqanliqini otturigha qoyghan qalin, élan qilinghan kabinétning xelqara jemiyetning telipige mas kelmeydighanliqini sözlirige ilawe qildi.