erdoghan: afghanistan mesiliside bashqa döletler bilenmu söhbet ötküzüwatimiz
jumhur reis rejep tayyip erdoghan afghanistan mesiliside bashqa döletler bilenmu söhbet ötküzüwatqanliqlirini éytti.
türkiye awazi radiyosi xewiri: jumhur reis erdoghan, istanbulda afghanistan mesilisi heqqide élan qilghan bayanatida, gherb dunyasiningmu, islam dunyasiningmu afghanistan mesilisige yéterlik derijide köngül bölmigenlikini tekitlep mundaq dédi: « biz barliq ul eslihelirimiz hem imkaniyetlirimiz arqiliq afghanistangha yardem bérishte tégishlik tirishchanliqlarni körsettuq, hazirmu körsitiwatimiz, jümlidin, afghanistangha yardem bérish xizmitimizni izchil dawamlashturuwatimiz.»
türkiyede nöwette jamaet xewpsizliki tarmaqlirida tizimgha élinghan we tizimgha élinmighan 300 ming afghanistanliq köchmenning barliqini eskertken jumhur reis erdoghan, mundaq dep körsetti: «nöwette biz hem özgirishlerni közitiwatimiz, hemde afghanistan siyasetlirini biz yaxshi bilidighan döletler bilen söhbet ötküzüwatimiz. jümlidin, tashqi ishlar ministirliqimiz bu döletler bilen dawamliq muzakirilerni élip bériwatidu. mesilen, tashqi ishlar ministirliqimiz ete chaqiliridighan shimaliy atlantik ehdi teshkilati yighinida uchrishishlarni élip baridu. zörür tépilghanda, taliban bilenmu muzakirilerni élip bérishimiz mumkin, derweqe, otturida bir réalliq bar bolup, bu heqte ishikimiz chékilgende, ishiklirimizni échip, söhbet ötküzermiz.»
yekshenbe küni, paytext kabulni qorshaw astigha alghan taliban, pirézidént eshref ghénining döletni terk étishi we hökümet küchlirining paytexttin ayrilishidin kéyin, sheherni toqunushsiz halda kontrol astigha alghanidi.
